政府想推廣電動車，日前率先引入一架落地試行，環境局局長邱騰華不甘後人，噚日親自揸住架新車去立法會，唔少議員、官員都對呢架新車好有興趣，車仔細細，收視率卻甚高。
為咗揸呢架新玩具，邱騰華早排專登考取揸政府AM車嘅車牌，由於佢本身有牌，所以好易過關，一take過就掂。新玩具落地，當然要玩盡佢，邱騰華噚日載公民黨陳淑莊同民主黨李華明遊車河，喺立法會附近兜一個圈。事後兩人都讚局長手車好定，電動車行駛時亦好寧靜，不過暫時未有興趣買新車，住灣仔嘅陳淑莊話平日多數坐電車往返立法會，李華明住將軍澳，擔心揸過海唔夠電，要成日叉電。