立法會「雙規」廣東考察團聽日下午出發，呢趟食得招積，住得舒適，講嘢失色，行動僵直，真係未出發，先興奮。八方知道隨團議員已紛紛整理行裝，收拾細軟準備起行，不能漏帶嘅梗係包括香港人平反六四訴求，至於追究屠城責任呢個包袱，雖然老董勸華叔應該放下，唔好孭住十幾廿年咁辛苦，不過何俊仁話未能忘記，不敢放低，點都會拎住北上咁話。
有口難言憑衫寄意
今次有冇機會向內地官員面陳平反六四，泛民議員都冇乜把握，甘乃威話雖然內地容許「無證」議員北上，但卻處處防範惟恐佢哋生事，所以佢會着一件象徵平反六四嘅T恤上身，睇吓內地今次招呼泛民係真情定假意，如果着錯衫就過唔到關要遣返，就證明阿爺只係借泛民過橋擺姿態，根本唔想聽港人心聲。
社民連陳偉業稱呢次係社民連首次有代表訪問內地，佢會打正旗號全程着社民連紅色黨衫，同時會向內地官員遞交一封要求平反六四信件。除咗平反六四，香港人仲有好多訴求，八方建議議員帶多幾件衫闖關，上面最好寫住呼籲市民7.1上街、追究豆腐渣學校元凶字眼，屆時就算有口難言，都可以憑衫寄意，內地冇言論自由，唔會連着衫自由都冇啩，唔通夠膽將議員剝光豬！
根據立法會秘書處提供行程資料，議員過關後先到深圳參觀機場同物流中心，再到廣州考察當地城市發展，然後往珠海巡視，其間會同各地政府官員見面，包括港府駐粵辦人員同港商，最高級應該會見到副省長，又會夜遊珠江；陳偉業自認識途老馬，話如果有空檔，可以帶隊去食夜粥，高達睇完份行程表則話行程好緊逼，四日三夜馬不停蹄，如果想自由行，相信只有清晨5點起身去飲早茶先有少少時間，趕鴨式行程冇自由活動時間，隨時慘過維景被隔離旅客，仁哥講明冇咁早起身，嘆茶唔使預佢。
呢個考察團諸多限制，表面上去考察珠三角發展，探討粵、港合作事宜，實際上卻係搞統戰扮和諧政治騷，立法會主席曾鈺成呢個團長醒定啲呀！
mailto:[email protected]