唔知點解，永遠記唔熟荃灣啲路，入親去梗會迷路亂兜一輪先安樂。學柴九話齋，人生有幾多個十年？無謂嘥時間喺搵路上，尤其SundayDriver、新牌仔一類，假日同Honey遊車河，花半日搵濕地公園喺邊，未去到兩口子早已壞心情。認路唔叻無相干，識得揀個靚正GPS，等同有道數碼護身符傍身，2秒內指到條生路畀你行，幫你趕走迷失鬼，逃出兜路地獄。
記者：徐影龍
攝影：梁細權
Model：Mandy
3D實景一望即曉
PAPAGO算係市面熱門牌子之一，雜項功能唔多，全部資源集中喺地圖上，勝在夠Pro夠快。最新09旗艦Z系列剛上場，包含全中國同香港地圖，無縫式顯示，毋須換卡或逐個市Download，資料庫龐大。最吸引我係3D輔助地圖，去到熱門十字路口，都有3D圖像顯示，一望就知要上橋抑或橋底過，免卻過往2D地圖唔知上定落嘅尷尬位。搵目的地、Set路線時，著名地標如康樂大廈、Megabox等，更以3D模型顯示，去銅鑼灣時代廣場，唔會搞錯去咗炮台山新時代廣場咁烏龍。
風水佬呃你十年八年，GPS一試便知龍與鳳；PAPAGOZ採用第三代GPS接收晶片SirfStarIII，配搭三星400MHzCPU，幾遠幾長嘅路線規劃，大多2秒內完成。實地試過，有意無意轉錯彎，未到街口已有新嘅路線指示，「咦，行錯路喎……」都未講完，已經聽到幫手配音嘅DJ朱薰同我講，「前面100米左轉。」絕對係迷路王救星。
7"芒王睇得過癮
另一超多人用嘅Shinco，定位晶片同CPU跟PAPAGO一樣有得揮，沿途燈位、迴旋處出口同樣準確無誤。但最令我欣賞係旗下7"巨芒王GM-702，比一般4.3"同5"型號，視野更為廣闊，對我呢類盲亨車手嚟講，毋須眯埋眼、花多一秒喺個芒度搵定位，揸緊車時視線最好集中望番路面，分心少一秒就多一分安全。
GM-702包含港澳地圖，不過Shinco出名周邊分唇多到爆，除藍芽接收外仲內置256MB記憶體主要擺地圖之用，透過SD/MMC卡槽，可播放MP3歌仔，又或MP4影片，實用又有娛樂性。
其他熱門選擇
勝在夠平
國產簡體介面，賣相同功能唔多，電子書算雞肋分唇，賣點係夠平。
FM駁機頭
附設藍芽及FM發射，機頭可接收GPS聲音，再由車內喇叭發聲。
內置1GB
屏幕為4.3"，多媒體功能強大，高達1GB記憶，方便儲歌或影片。
GPS
GPS由軍方研發
GPS全名為GlobalPositioningSystem，跟互聯網一樣原為軍方開發科技，1958年由美國海軍武器實驗室建立「海軍導航衞星系統」，直到1994年24個衞星全部正式到位，提供全面導航功能。定位原理為透過3顆衞星，測量訊號接收者嘅距離同位置。
AGPS
手機潮興
GPS本身受大氣折射、大廈鏡面反射等情況，會出現訊號誤差，近年手機界就透過上網功能，去彌補GPS盲點時嘅定位，如SEG705、NokiaN78等。AGPS缺點係須付費上網及即時更新速度慢，揸車未必有用，但對行山者就相當重要。
MORE
漸成新車標準
好多新車到港時已內置LCD同GPS，如Benz、寶馬等部份車款已附設GPS，早前豐田更跟DATAWEST及TTHC合力開發「SG+導航/娛樂系統」，集多媒體功能及衞星導航於一身，證明GPS已漸成標準配備。
B200夠抵玩
捐窿捐罅走勻全港實測GPS，一架舒服小車絕對重要，今日借嚟BenzB200，個無段變速波箱經廠方調校過，波段上落順暢自然，走彎多山路或鬧市街坊彎，都轉得好順；畀啖油、啪埋+/-波嚟玩，136匹馬力即時爆住去，加上B200細車輕巧格局，加速力相應提高不少，上飛鵝山時手痕踩快些少，轉埋SportMode時扭力提高，好多時未夠3油門已經要收。小改款後有磨砂銀鬼面罩、換咗頭尾泵把同17"軨，車價只係30萬多啲，算係平玩又有馬力嘅Benz。
查詢：仁孚行
（28957339）
查詢：
（a）米迪亞（31881036）
（b）Shinco（36699888）
（c）PitStop（23926476）
（d）金輪汽車精品（27704799）