「希望生日有人求婚」
馮仁昭四圍超：30歲關心妍隔空逼婚 - 馮仁昭

音樂人徐偉賢前晚喺樂富舉行「NeversayNever慈善音樂會」，今次揀喺512大地震一周年舉行，因為徐偉賢想將啲門票收益撥捐畀受地震影響嘅同胞。佢又請咗孫耀威做表演嘉賓，而到嚟捧場嘅仲有關心妍（Jade）、高皓正同張致恆等。

「會做個好太太」

阿Jade呢個月就約滿BMA唱片公司，之前有傳佢約滿後退出結婚嫁人，因為佢有位要好富家男友楊長智（Jonas），之前阿Jade話自己好想30歲之前結婚，佢家係待嫁心情，佢講笑咁話：「我等人求婚吖嘛，如果佢求婚我一定考慮，今年7月生日就30歲，我都想結婚，希望生日有人求婚啦，我會做個好太太。」阿Jade真係恨嫁恨到出晒口，唔知男友Jonas聽見有冇的起心肝去求婚呢？
另外，Jade雖然同BMA唔再續約，不過佢欠一張唱片約，為咗好嚟好去，所以佢臨走前要完成張新碟，馮仁昭覺得BMA都唔會幫手造勢宣傳，Jade話：「我都預咗，不過好歌唔怕嘅，我會繼續keep住做音樂嘅工作。」佢遲啲仲會去加拿大做騷，呢啲係以前接落嘅工作。

孫耀威嗜辣失聲

孫耀威早前食完餐泰國勁辣美食後，搞到聲帶爆微絲血管，難得今次演出可以開番聲，佢喺音樂會度唱《十誡的意義》，問佢有冇遵守十誡唔會婚前性行為，佢話：「呢樣唔係問題，最大問題係唔能夠講大話。」有人即刻問佢有冇拍拖？佢就寧願唔答喎，因為唔想講大話。