薄薄的小書擠在大堆漫畫當中，沒有繽紛色彩、沒有花樣卡通，說的不但是感人至深小故事，一格又一格的黑白線條，一句又一句簡潔的旁白，述說年輕人追尋理想、犧牲生命的經歷。漫畫家馬龍10年前推出漫畫集《八九民運血染的歷史》，以漫畫打開真相的門戶，讓年輕人了解六四面貌。
民運發生時，馬龍正在報章任職美術總監。血腥鎮壓，令他非常哀傷，「新聞日日都係，鋪天蓋地，甚至副刊啲專欄全部都係講緊呢件事，上至達官貴人，下至販夫走卒都好關心，我當時發現，中國社會同我哋認知差距好大。」
為了歷史真相而畫
開槍當晚，馬龍和很多巿民一樣，守在電視機旁，「完全估計唔到會有啲咁嘅事情發生，成個人儍咗、呆咗，成個政府倒退成咁，唔得喇，要去新華社，嗰時橫風橫雨，個個淋到成身濕晒都唔理，唔會話諗到擔把遮，北京啲學生擋子彈都係咁，我哋淋陣雨算係咩。」
「嗰時演唱會呀好多人去，跑馬地成日人山人海，成個巿面為咗件事停晒，大家都唔知點算好。」
當年的「屠城」，20年後演變成「有啲問題」，馬龍不無感嘆，「年輕啲嘅，唔係太了解係咩事，唔係太關心，因為佢哋得到嘅訊息唔多，唔同我哋睇到好多真實影像，睇到軍隊點入城，氣氛係點，令好多人以後一生都為咗呢件事，影響我好多嘢。」
10年前，支聯會常委張文光跟他聯絡，希望他畫一本漫畫記錄六四，「佢話件事過咗10年，好多小朋友都已經唔知。」於是他斷斷續續用了半年時間做資料搜集，利用漫畫訴說歷史。
《八九民運血染的歷史》筆法寫實，線條簡單，調子沉鬱，強烈的黑白對比，「有啲加咗旁白，同埋用咗真實相片，用濾鏡加工，加強真實感。我嘅目的係將一段歷史講出嚟，唔想加個人睇法，但講咗出嚟，稍有良知嘅人都識判斷是非，唔使我再講咁多。」結果，這本書引發了不少年輕人對六四的興趣，主動了解歷史真相。
「呢個國家好鍾意用『母親』嚟自比，但有邊個母親會為咗小朋友唔聽話而殺咗佢㗎呢？打傷佢就有啫，無論佢點詭辯都冇用，死咗幾多十、幾多百、幾多千，數字唔緊要，立心殺人先係重要，一個都太多。」他直言沒想過六四20年仍未能平反，「嗰時諗一個國家嘅政府爛成咁，仲唔死？三年就被人推翻啦，唔推翻內部都分裂啦，結果佢冇事，反而蝴蝶效應，成個東歐冇咗，成個共產主義冧咗。」
「冇民主好唔道德」
民運後，中國政府主力發展經濟，拒談政改，「其實係抄緊新加坡政府，有自由、冇民主，大家安心搵錢得㗎喇，但唔好講政治。大家長心態，係殖民政府伎倆，你話因為六四後經濟破壞得好緊要，脫貧緊要啲，我都原諒你，咁樣行10年、20年，都仲唔畀民主你，連假嘅（民主）都唔畀你，就說不過去，好唔道德。」他樂觀地看，現時中國社會較以往文明，「起碼唔會隨時捉你出去鬥，我哋靜心等待，再換咗一兩代人，胡錦濤之後新領導人變數大啲，可能換一個有其他諗法嘅人，六四有機會平反。」