每一行總有害群之馬，二十年前的士佬俾人話得最多嘅，係改咪錶跳快啲，今時今日已絕迹，但博大霧兜路呃遊客，仍然時有聽聞，但點都唔及今日阿Laughing哥講嗰單咁好笑。話說有位乘客搭十幾蚊的士，畀一嚿水等找錢時，司機居然當收廿皮咁找，雙方各執一詞，點拗都係無結果，乘客惟有死死哋氣落車。點知事隔幾日，居然俾佢遇番同一的士佬，今次醒喇，喺張一百蚊紙度「落焊」，個司機不知就裏重施故技呃多次，有證有據底下唔使講嘢，去差館啦。個司機聲淚俱下求晒情，又上有高堂又仔女無書讀，最後個乘客都放過佢，不過就將佢個司機證影低擺上網，等大家小心提防。係真實個案定私人恩怨無人知，不過呢類呃人行為已經好唔啱，我黃師傅憎呢類人多過八折黨，陀衰的士界。
文：黃師傅