臨危受命做美國國際集團（AIG）主席嘅利迪（EdwardLiddy），一向大口氣，對住國會議員都冇面畀。噚日《金融時報》報道，利迪已經預備好今日去國會發言，內容係叫班唱衰AIG嘅議員收聲，唔好再批評佢哋，否則只會損害集團價值。由於AIG多次接受華府救濟，政府揸咗AIG八成股權，納稅人變相係AIG大股東，咁唱衰法，即係損害納稅人利益。
國會縱壞就慣晒
其實早喺舊年底，利迪已經挑戰國會，話說佢本來禮拜四要同國會開會，仲要提交一系列資料，不過利迪接受CNBC訪問時話，國會禮拜二先發信畀佢，話星期四要料，所以唔夠時間預備，結果會議要延後嚟遷就佢。唔知係咪上次國會太順攤，所以縱壞咗利迪。
不過，利迪今日去國會仲有其他目的，當中包括向政府呢位大股東，交代番集團未來嘅發展計劃，講吓AIG將來縮減規模、提高效率嘅詳情，亦會同其中一位眾議院監察委員會委員，傾吓大家以後可以點樣合作得更好。
有個咁撐員工，又咁有吉士嘅波士，做員工嘅真係要生生性性畀心機，唔好衰畀人睇落老細面喇！
李華華
mailto:[email protected]