泰國黃衫軍去年上街示威反他信之時，左丁山與泰國友人透過電郵辯論黃衫軍之做法是否合乎民主。左丁山認為他信及其接班人既然由人民投票選出嚟，而且贏選票贏到離行離列，黃衫軍應該尊重人民選擇，不能以非選舉手段趕走他信黨人，否則就係破壞民主。泰國朋友就話外國人（包括左丁山）不懂泰國，不知道他信如何貪污腐敗；他信黨人賄賂農村選民，上台後就自己上下其手偷國家錢，既然選舉不公平，再選都係他信贏，故此要以人民力量趕走他信黨。
泰國貪污根本不是新聞，不論誰人執掌政權，貪污係一百年不變，以貪污入罪嘅官員，只係政治鬥爭之失敗者，至於他信如何賄賂農村？原來係政策向農村傾斜，大量增加農民補貼，每條鄉村畀一個獎學金入大學，於是農民票入晒他信個袋。至於用真金白銀買票咯喎，買得幾多張吖。
政黨為贏得選舉，以政策「賄賂」選民，西方國家最叻，他信只係偷師啫。英國工黨發生連串醜聞，民望大跌，若現時大選，白高敦會立即搬出唐寧街十號，於是提高稅率至百分之五十，向富人加稅，為平民消消氣，富人大聲嘈，米高堅話要離開英國，咁又點？英國人年入十五萬鎊嘅，只有三十五萬人，代表好少選票啫。日本法國長期大力津貼農民，不理WTO反對，咪又係買農民選票！美國嘅農業津貼政策何嘗不是如此，有邊位共和黨或民主黨總統夠膽取消？
奧巴馬上台，靠工會力量好大，佢嘅政策一概以工會工人利益行先，公司小股東利益可以拋落坑渠，睇吓「佳士拿」破產重組就知道晒，連有抵押嘅債權人都唔可以依照美國法律取回其應得嘅利益呀。最新個案係加州面臨破產，加州議會幾經辛苦，共和黨與民主黨州議員卒之同意通過一個救急預算案，大力加稅，同時削減支出，包括削減保健（health-care）工會會員嘅七千四百萬美元薪酬。點知工會立即去華府告狀，奧巴馬政府通知加州，如果唔畀番工會會員七千四百萬美元，聯邦政府就會扣起發給加州之七十億美元聯邦津貼，視州份權力如無物。咁都得，可見奧巴馬政府「賄賂」工會不遺餘力。現代民主制度之中，唔用政策賄賂選民買選票，邊個政黨可以贏呀！