古巨基與金牌大風2月中約滿後，一直未肯續約，有消息指基仔因不滿金牌大風老闆鄭東漢為了讓兒子鄭中基做公司CEO，竟將基仔的恩人黃柏高發放邊疆，只可管理電影業務，所以決定不續約轉投英皇，但昨日鄭中基卻否認做CEO，更發炮罵基仔不想續約還借勢搞是搞非。
古巨基與金牌大風的續約問題擾攘多時，一直拖字訣的基仔其實暗中四出找其他公司談合作，據悉他與英皇已談得七七八八，不過在他即將要公佈新動向前，有消息卻指基仔不續約金牌絕非無義氣和反骨，反而是因不滿大老闆鄭東漢為了讓兒子鄭中基上位做公司CEO，刻意將合作長達14年的夥伴黃柏高（Paco）削權，表面升他為香港區主席，實質是明升暗降，因今後他只能參與電影部事項。由於Paco是一手把基仔帶回港發展，所以公司如此對待其恩人，他才決心要蟬過別枝。
「走就走咪搞咁多嘢」
不過鄭中基似乎並不相信基仔不續約是為了Paco，同時他也否認了會擔任金牌大風的CEO，昨傍晚他與助手在深水灣沙灘一間餐廳出現。記者問他有指他要接任金牌大風CEO，何以有空看海喝東西，他聞言一臉不屑說：「乜嘢CEO，講咗好多次冇呢件事，我老竇從來冇逼過我做CEO，我都冇興趣做。」至於有傳其父鄭東漢因此與黃柏高鬧不和，Paco更被削權，鄭中基說：「根本就冇不和，公司重組想發大搞好電影方面，Paco呢幾年做電影做得有聲有色，所以佢先要專注呢方面，花幾年時間搞好佢，但音樂方面有乜重要決定一樣要經佢㗎，佢一樣咁重要，成件事係某啲有心人唔想續約借勢搞是搞非。」
是否指傳聞將過檔英皇的基仔，鄭中基即時扯火說：「我冇話邊個。不過佢一早諗住走㗎啦，要走咪走囉，可以好嚟好去㗎啫，又怕人哋話佢唔飲水思源。佢話要發展電影市場呀嘛，Paco家主力搞電影，啱晒佢㗎，Paco正係需要佢幫手嘅時候，佢咁關心Paco，咁情深義重，更應該留喺度幫佢啦。根本係借機會想甩身咋嘛，講多都嘥氣，走就走咪搞咁多嘢呀。」
「最扯火話我做CEO」
問鄭中基最近工作，他表示除了錄影《美女廚房》外，還將開拍幾部電影，他說：「我6月要翻拍《西遊記月光寶盒》，劉鎮偉導演嘅，拍完呢部就拍谷德昭導演嘅魔術師片，10月又要拍賀歲片，又要去新加坡做演唱會，另外仲簽咗兩部戲，都唔知邊度搵時間嚟做CEO呀，你教吓我啦，CEO真係唔易做㗎。唉，擺我上枱做乜啫，最扯火話我做CEO，咬住我唔放做乜啫。」
基仔昨晚在無綫將軍澳電視廣播城演出賑災騷，談到合約去向，他說：「已經有定案，但未係適當時候公佈，希望今個月可以講。」可會不捨得金牌大風，他說：「我都冇講走定唔走。」他還指與Paco合作多年，大家很有默契，又讚對方是一個值得尊重的人。至於有指Paco被調到電影部，基仔會否與他在電影上合作？他說：「佢電影上搵我，我都樂意拍。」
Paco對兩位「基仔」的爭拗不想發表評論，他昨日說：「其實我由年初已經同基仔傾續約，但一路都冇進展，所以佢續約與否我唔相信同我調職有任何關係。不過家我已離開咗經理人部門，所以佢嘅去留我理唔到啦。」Paco否認跟鄭東漢不和，他又說：「做咗近30年音樂，呢6年我喺電影方面發展，我覺得內地係一個潛力好大市場，所以我想呢段時間好好專心發展電影業。」
剛接管Paco的經理人及唱片部工作的陳輝虹昨日被問到基仔續約進展說：「仲未傾好，家我哋等佢回覆，基仔曾經話想Paco幫佢搞部電影，但係家Paco搞電影部，佢又唔幫手，真係好奇怪。」至於基仔續約成數，他說：「如果出邊真係有好offer，新環境又達到佢嘅要求，咁我都祝佢一帆風順。」對於古巨基過檔英皇傳聞越炒越烈，英皇高層霍汶希昨日說：「我都好欣賞基仔，佢有好多嘢未發揮出嚟，希望有機會合作，但係唔係好似出面傳言咁簽硬。」
採訪、攝影：丁寧、何慧斯
娛樂突發組
話你知：中基金牌一家親
續約風波：拉鋸數月反枱收場
其實古巨基今年2月已約滿金牌大風，但他卻遲遲未肯動筆續約，最後辣㷫金牌收場。
去年9月：傳出黃柏高以3千萬斟基仔續約，基仔當時聲稱「續約係講心唔係講金」。
今年1月：基仔在《十大勁歌金曲頒獎禮》中奪得最受歡迎男歌星獎，有傳是金牌用盡法寶為他爭取得來誘他續約。
3月：基仔表明續約的首要條件，是他的演唱會不可cut飛，令他可向鄉紳父老交代，金牌隨即答應。
4月初：有指基仔暗中與別的公司接觸，包括英皇與內地的華誼兄弟公司，令金牌老闆鄭東漢十分不滿。
4月23日：基仔紅館開騷前與Paco一同拜神，二人交談一句起、兩句止。
4月27日：基仔開騷請來屬於英皇的蔡卓妍擔任嘉賓，惹人揣測。
4月28日：在演唱會慶功宴上，基仔再向金牌發功，稱續約首選必是舊公司。
5月初：Paco被調職，主力管理公司旗下電影發展，有指基仔因此決意離巢。
資料來源：《蘋果》資料室
娛樂資料庫：出道15年頻頻過檔
古巨基與金牌大風最近因續約問題鬧至滿城風雨，其實他以往續約總是問題多多。早年基仔因主持無綫《娛樂新聞眼》被賞識獲簽約做歌手，後因合約問題遭無綫雪藏年半，輾轉間才簽約藝能動音唱片公司，94年推出首張唱片《愛的解釋》，更認識了女友Lorraine（陳英雪）。96年基仔憑《歡樂今宵》一曲走紅，藝能動音打算與他續約，但基仔沒有續約，最後轉投華納唱片旗下的eei。至01年約滿eei，基仔重施故技，最終沒有唱片公司肯簽他，惟有返內地拍劇，其後簽約金牌出碟。
基仔05年奪叱咤男歌手金獎時，聲淚俱下說：「我第一個要多謝嘅人係黃柏高，係佢將我執返嚟樂壇。」似乎沒半分造作，事實上他02年返內地拍攝劇集《情深深雨濛濛》，贏了內地知名度但輸了香港市場，全靠Paco拉他重返樂壇，將他推向事業的另一高峯。