荃情報喜之溫馨返港--汪明荃和羅家英上周在拉斯維加斯正式註冊結婚，昨日羅生羅太終於由美國返港，二人襯到絕，一身情侶頸巾及格仔恤衫，並幸福地騷婚戒，新入門的阿姐更即到家英哥舊居斟茶拜祖先。
新婚的汪明荃和羅家英昨日由美國回來，他們穿戴情侶格仔恤衫及圍巾出現，心情靚爆的阿姐十分風騷，即場大晒兩人的結婚戒指，更不時挽着老公手臂，一副幸福模樣。當要求兩人親吻時，家英哥即說：「唔好為難我喇。」記者要求羅生羅太影相，阿姐自言未習慣該稱呼，她再次強調不會在港擺酒，但已有不少朋友要求度期食飯。
「淨係識講IDo」
阿姐與家英哥異口同聲表示，婚後未有太大分別，兩人依然以工作為上，強調婚後需一段時間適應，但最重要有大家空間，希望像未婚一樣。家英哥自言心理上有改變，例如對女仔有抗拒，阿姐即開玩笑叫身邊的兩位女主持行開。
家英哥即晚要回內地開工，問他會否不捨得阿姐時，他即對阿姐說：「我掛住你呀！」令阿姐笑不攏嘴。阿姐又取笑家英哥結婚當日比自己更興奮，她說：「佢不知幾開心，佢唔係好識個外籍註冊官講乜嘢，淨係識講IDo。」
已昇華唔使洞房
家英哥爆出多年前已打算與阿姐結婚，他說：「之前媽咪過身，都想喺個訃文上畀阿姐一個名份，年幾前原本打算喺大西洋城登台順便註冊，但係當地手續好複雜，所以唔成事，媽咪都恨咗好耐不過恨唔到，返屋企都會裝香畀佢。」
婚後家英哥會搬到西貢與阿姐同住，問他對太太有何要求時，他說：「對我溫柔啲，煮餸就唔使，等我煮畀佢食，總之大家多啲自由同尊重，有時又唔可以一齊工作就互相掛念。」至於婚後相處之道，家英哥說：「佢大聲我收聲，佢進咪我退囉。」阿姐和家英哥結婚當日分房而睡，被笑指未有洞房，他說：「呢樣嘢唔使，已經昇華咗去第二個階段。」
二人離開機場後即返回家英哥在廣播道的寓所，接着他們及家英哥的大家姐一齊到樂富買生果，再去舊居美東村祭祖，家英哥說：「去斟茶拜祖先，我弟弟喺度住。」而阿姐表示，她有斟茶給大家姐，也有向祖先敬茶。祭祖之後家英哥駕車送阿姐往油麻地八和會館開會，而家英哥則返回家中。
採訪：王崇穎
攝影：葉君海、娛樂突發組
