港產片！都真係冇咗信心好耐，記得對上睇《新×事件》，都係為睇某某俾人狂抦先去撐場（心都凉晒！），啱啱行過碟舖，老闆竟然力推《短暫的生命》DVD！
唐寧！昨日鄰家小女孩，戲中竟成中女阿媽，心中有一刻湧起中年危機；再睇有全裸大露背！咁大膽？後知替身代演，大家睇完或者都同聲講句：「好彩唔係佢！」
故事內容幾沉重，虐兒阿媽（唐寧飾）竟重手打死自己個親生女，後被警方揭發其同居男友竟有孌童、亂倫行為，以港產片尺度，係一個較敏感題材；後警務處助理處長（邵美琪飾）竟高調插手，不惜以拷打、通櫃，甚或以親生女受虐的相片、影片，以攻心之法嚴刑凌辱！但唐仍拒絕承認默許同居男友侵犯小女兒，原來背後另有辛酸故事；如以獵奇心態，差館問話室一幕，真係幾有「實感」震撼！不過更令人心酸者是故事由香港真人真事改編，這種「三級」的香港故事，可能你扮衞道唔買，但佢每日都在發生！
整隻DVD在聲畫方面未見有太大考驗，dtsES6.1，可以用「有找」嚟形容；但$77街價純買故事，冇刪剪片段、冇Unrate加長，Bonus只得演員說評，真係有啲唔夠喉！
記者：朱崇德