梁展文宣佈同新世界中國地產提前解約時，引用蘇軾詩句「雲散月明誰點綴，天容海色自（本）澄清」自況，噚日立法會聆訊時，李永達無厘詩意，問佢其實想表達乜嘢感覺，梁展文語帶無奈咁講，「大家聽我語氣，就已經知我感覺係乜。」
工聯會潘佩璆有啲墨水，質問梁展文識唔識「瓜田不納履，李下不整冠」，暗寸梁不懂避嫌；梁展文吟兩句《離騷》，反問議員有冇聽過「亦餘心之所善兮，雖九死其猶未悔。」意謂為咗理想，即使死九次亦在所不惜。咁講法，即係被人屈到慘過屈原都死不認錯啫。潘佩璆又問佢事到如今，覺唔覺有係個損失，梁展文好感慨：「呢個可能要寫本書至得，所以我都係唔好講嘞。」