筆者仲係o靚仔嗰陣，跳舞機《DanceDanceRevolution》真係流行過乜，唔止間間機舖都要整番部守門口，連阿水都識得哼句《Butterfly》！當《DDR》開始成為街機小眾派，家佢又出番喺家用平台，除咗大玩網上互挑鬥高分，仲班埋英皇群星俾你跟住↑←↓→跳，就算唔係舞林高手都可以同祖兒Twins跳餐飽啦！
文：陳福榮
港台Hit歌任揀
自從PS強勢滿街都係老翻跳舞氈，當年真係勁多人喺《DDR》度用咗唔少青春，不過咁多年依然同中文歌無緣，抄佢嘅台灣Game反而仲早有國語歌，你都咪話唔吹脹。
經Konami多年爭取，呢隻取自美版原裝引擎嘅《DDRUniverse3中文曲特別版》終於一圓夢想，佢勁在唔單止收錄咗容祖兒、Twins、謝霆鋒、關智斌同泳兒等廣東歌同國語歌，連台灣紅人蔡依林、蕭亞軒、張惠妹、棒棒堂及花兒樂園等佳作，再加上來自Moby等嘅歐美跳舞歌與K廠原創歌，中文歌能佔一半內容，都算係咁上下啦！
開派對互陰似砌磚
既然係《DDR》，簡單直接嘅街機模式同練習之類固然係必備，但玩落發現佢啲判定規格比較寬鬆，只要唔係慢得太離譜亦照俾你過骨，唔似得以前PS嗰啲快少少都Poor你！
出得喺家用機，當然要整啲啱親朋戚友聯誼用嘅玩法，除咗意圖向WiiFit致敬嘅健身模式外，最過癮就梗係任君選擇勝負條件嘅派對模式，鬥高分、鬥跳得齊、鬥快甚至插住四張氈都仲得；新加入好似砌磚Game嘅攻擊同放炸彈亦係一絕，尤其後者假如整唔到5Combo就即刻玩完。兩條友互相將個炸彈掟嚟掟去，真係刺激緊張過玩《炸彈人》。
任務模式買靚衫
開Game玩家先要設定舞者性別、髮型同膚色，由入口第一關開始逐層攻入去，而部份關卡即使同一首歌都會有三個難度，最高級嗰啲要做到「少於5個Poor兼有60個Great」等條件，所以跳得晒成首歌亦未必可以Clear。
越難玩自然越高分，積分除可用嚟挑戰特別關卡；賺分嘅另一用途，就係幫角色裝身，皆因身上服裝以至頭髮顏色都要逐款購買，想個角色跳得醒目啲，就花多點心思整靚佢啦！
Profile
機種：XB360
廠商：Konami
類型：ACT
人數：1-4人
售價：$530（連跳舞氈）
發售日：5月中
