N波等燈 壞手勢

N波等燈 壞手勢

早幾日揸車接個剛由外國歸來嘅女友人去中環HighTea,轉入皇后大道中之後就勁多燈,等燈時我好自然咁將波棍推去N波,女友人即時叫道:「做咩呀你?」吓?做咩?咩都無做喎!原來友人係指我轉N波呢個動作,仲問我點解要咁做。我想都唔使想,即時答:「方便又慳油囉!」又或者應該講,呢個係舊一輩車迷揸車嘅習慣動作,友人即時指出:「方便就真,點可能慳油?最大問題係會增加波箱運動機件耗損,減短壽命。」
當轉入N波即空波時,引擎無任何負荷而加速空轉,慳唔到油之餘仲嘥油,佢話最好就係踩住Brake等一等。佢老公係教車師傅,唔通我話佢唔啱咩!之不過友人所說合理,而且嘥油事小,傷車事大,話晒我都係一個錫車嘅阿太嚟㗎嘛!呢個壞手勢都要改一改。

文:大姨媽