大市調整，真係「回一回」就完成？恒指噚日在17000點大關爭持，最低16908，下跌近180點，但午後跌勢扭轉，收市反升65點，期指升勢更勁，尾段仲急急抽上，大升378點，高收17188，由大低水變番高水。
市底好壯，上升正股又有460多隻，落後股仔紛紛從後趕上，由於實在係跌到殘晒，所以一發力，升勢都好勁，噚日升幅在20%以上嘅，就有17隻，有大成交支持嘅，係排第5同第6位嘅福田實業（420）同永安旅遊（1189），升幅分別為32%及28%。
永安旅遊已連升多日，噚日更一支大陽燭抽上去，高收5仙，大升1.1仙，成交已連續兩日大增到超過2億股，上周三由2.9仙起步，升幅雖逾7成，但07年中，永安旅遊股價曾企0.70元水平，現時都只係得番一小截，就算再升一個開，上到10仙，都仲係好低。
永安旅遊有力再升一倍？有，因為佢每股NAV值成20仙，股價見10仙，仲係大折讓50%！而且呢個NAV，仲係撇到乾乾淨淨嘅數，唔排除日後有回撥。
睇番盤數。08年（12月年結），營業額22.16億元，微減2.2%，股東應佔虧損6.88億元，而前年只虧蝕1619萬元。去年，集團確認減值虧損約6億元，包括酒店物業及在建工程減值3.16億元、唐古拉豪華列車業務及澳門酒店業務之無形資產減值1.92億元，以及在中國之可供出售投資減值約8700萬元。
現金多利拓展
集團擁有6間酒店，以及唐古拉豪華列車同證券投資業務，撇乾撇淨後，集團資產淨值為18.36億元，每股NAV20仙，現股價大折讓75%。
集團擁有唐古拉72%控制權，唐古拉擁有青藏鐵路北京至拉薩及北京至麗江兩條路線經營權，原定於京奧前開通，由於全球經濟衰退，推延至明年首季才營運。
踏入09年，在各國政府大力刺激經濟下，各地股市和樓市都已有起色，旅遊業亦開始有轉機，物業同證券價值回升，永安旅遊有頗大機會在09年將部份撥備撥回。
08年底，集團手頭有現金4.98億元，而以噚日收市價計，永安旅遊市值亦只4.6億元。公司現金充裕，有消息指管理層正滿肚密圈，鋪排多項發展大計，為大偏低股價帶來刺激。
郭兆誠