航運Ｃ以前努力創業搵銀，甚少參加校友活動，好幾年前唔知為乜見到佢，講起捐款幫助母校發展，例如獎學金之類，航運Ｃ話佢可以盡吓力嘅，但想捐畀一啲發揚儒家教育傳統道德嘅項目。咁嘅心思，好少聽見，立即代佢搵項目，卒之航運Ｃ捐款支持一個「中華美德教育」研討營，從此航運Ｃ熱心參加母校活動，又捐助其他，今年仲做埋東華三院總理㖭。
DHL創辦人鍾普洋有一次請左丁山吃法國餐，講起人生三大階段，對佢嚟講，第一個三十年係學習搵錢（包括讀書與初入社會學習期，佢主修漁業，與佢一生事業無關，但學習魚類教識佢如何分析羣體行為），第二個三十年係搏命搵錢，第三個三十年甚至第四個（即六十歲以後）就係退休階段，專心捐錢與做一啲前六十年冇幾多時間投入嘅興趣項目。具體啲講，阿普哥家到香港大學教EMBA（創業與企業家精神），捐錢支持文化藝術發展，教NGO如何籌款，真係越做越高興，生活越來越精彩。以此看來，航運Ｃ即將進入人生第三階段，唔怪得佢話已經提名競選校友會會長，徹底投入校友活動。
資深校友森哥早已進入人生第三階段，佢與阿叔林尚義係香江書院同學，年紀當然已是古來稀以上啦，佢搵錢冇鍾普洋咁多，差好遠，但捐錢量力而為嘅啫，做義工就日以繼夜，全力以赴。同佢講起林尚義，佢就話人老咗，多啲在街外奔走，可以活力化，年輕化，越跑越有活力，故樂此不疲。呢輪佢又為曾經服務過嘅塘尾道官立小學推動金禧校慶綜藝晚會暨校友會成立典禮，五月十九日星期二晚上七時三十分假荃灣大會堂舉行，請前校長何麗雲、董柏基、教育局官員及校友郭亮明（懲教署署長）及黃重光醫生等人主禮，查詢電話23930800，請塘尾道官立校友踴躍參加。
森哥既曾與林尚義同校，問多幾句。佢有林尚義年少時逸事講，聽落幾有趣，森哥話中大有位陳耀武，曾經講過波，應該知得更多。後來與教授Ｗ講起，教授Ｗ話陳耀武已在中大退休，佢對球壇歷史掌故瞭如指掌，如有有心人寫香港足球史，唔訪問陳耀武就係大損失，中大社會系教授呂大樂（下學期轉到港大）曾開一科教足球社會學之類，但呂教授年輕過陳耀武好多，對香港足球史嘅認識，陳耀武可以認中大第一。