近期提起杜奧巴，腦海不期然浮現〔PG家長指引〕，皆因佢上星期對巴塞隆拿後對住鏡頭爆粗鬧球證一幕，大家仲未消化完，轉頭就有人設計咗個佢掌摑球證嘅網絡遊戲（ http://www.littlehooliganz.com/drogbaby），痛快但意識不良。假如你係阿仙奴球迷，話唔定想整番個摑杜奧巴嘅遊戲，講到尾，近年佢為「兵工廠」帶嚟太多恥辱啦。
專恰小兵累法比仔發茅
有冇數過杜奧巴過去幾多次射爆「兵工廠」？真係10隻手指都數唔晒！淨係計近年就有前季英聯盃決賽梅開二度，令車路士贏2:1捧盃，而去季聯賽主場又包辦兩球，開個翻炒波膽，唔到你唔服。好啦，前晚車路士大勝阿仙奴四個一皮，明明4球都冇杜奧巴份，但又有間接功勞。話說喺27分鐘，佢博到法比加斯犯規，查實接觸唔明顯，杜奧巴都即時影帝張家輝上身，變成滾地葫蘆，博到罰球兼令法比加斯領黃牌。咁都唔止，佢起身後就開個自由球畀阿歷士洛里高頂入，完全打洩阿仙奴道氣。阿仙奴失呢球波前，形勢幾好㗎陰功。
雲格：佢「插水」博罰球
呢場波阿仙奴最終輸1:4，今季英超首次對Big4球隊輸波，調番轉係車路士今季英超首次對Big4球隊贏波，最慘係阿仙奴32年嚟主場最大敗仗，領隊雲格唔激氣有鬼，直指杜奧巴「插水」：「我哋身處嘅聯賽，竟然容許『插水』者得到回報，個罰球根本唔應該判。」唔知阿仙奴球迷會唔會有樣學樣，整個杜奧巴一邊「插水」，一邊被摑嘅網絡遊戲呢？
法比仔第一面黃牌好似有啲寃枉，但無幾耐佢從後攔截，球證杜特就冇再整張黃牌佢嘆。杜特當時作勢叫法比仔望吓個錶，應該係話：「細路，你唔係想咁早出場啩？」擺明係「補償」兼放法比仔一馬，諗到呢度，或者阿仙奴球迷條氣都順番少少啩。