旅發局新人上場大改陋習，氣象似乎一新，不過近日卻好似鬼揞眼，網頁內有關端午節龍舟賽事賽程表第四頁，寫住呢個月24號有場「慶祝中華民國建國60周年暨東區龍舟競渡大賽」，大家都知「民國」並非「人民共和國」簡稱，旅發局竟然慶祝「中華民國建國」，真係好彩23條未立法，否則拉人封舖都似。
八方睇真啲，英文版本寫PRC又無錯噃，負責呢場龍舟競渡嘅柴灣漁民娛樂會負責人黃先生話今次俾旅發局害死，「俾中聯辦睇到就大件事！」佢話係透過電話同旅發局職員講比賽資料，之後冇核對，可能因此出錯，會盡快更正。向八方報料嘅攝影發燒友姚佑雄話，佢話好驚奇，「呢個錯誤係唔可以有㗎。」