無綫搜奇式節目《謎》又嚟啦！今次新一輯會喺呢個禮拜五緊接《掌故王》推出，主持大局嘅仍然係鄭少秋，佢嘅身份係特務001（Adam鄭），謎女郎呂慧儀繼續有得留低，至於上集嘅王貽興就被飛出局，換嚟飾演謎女王嘅羅蘭姐，仲加多個喬寶寶飾演嘅特務線人R㖭。
羅蘭養紙板狗
新一輯嘅《謎》開正秋官嗰瓣，因為每集都要扮嘢，令扮嘢秋又有機會顯本領；至於謎女郎呂慧儀梗係要性感，唔係咪浪費咗佢咁養眼嘅身材，所以佢嘅服裝唔係低胸就係露腿。其中一集喬寶寶就扮成二撇雞蒙羅麗莎，謎女王羅蘭姐就頭戴后冠，但最抵死嘅係佢啲寵物狗仔全部係紙製嘅。
秋官喺其中一場戲度，要扮成電影《22世紀殺人網絡》中奇洛李維斯嘅造型，仲要慢動作拗腰。為咗方便拗腰，現場放咗張凳畀秋官頂住腰骨，點知秋官有個無線收音器綁喺腰度，佢一個大拗腰就俾個收音器頂傷腰骨。
此外，呂慧儀前晚上咗《大咕窿》節目做嘉賓，仲同喺節目入面扮大灰熊嘅男友黃文迪同場，佢哋喺現場表現避忌，但間中都彼此偷望。事後呂慧儀話今次做嘉賓唔係要撐男友，反而係男友撐佢先真，佢話：「因為我唔識游水，有事時佢救我咪得囉。」
