以為埃及豬隻無辜慘死，豈料世衞官員突然反口食豬唔放心，真係峯迴路轉。既然維景酒店解封咁高興，不如成班約埋烚吓烚吓賀一賀佢，叫碟靚牛慢慢慶祝。怕貴都唔使學阿蘇喪嗌「平啲啦」，《蘋果》再益讀者，剪低coupon即送你一碟$88美國安格斯牛頸脊。
記者：王震遠
攝影：楊錦文
模特兒：Kipprick&Evan@PureModels
蒙古燒烤湯底啱食肉獸
香港人最鍾意烚吓烚吓，唔理外邊30幾度，開行冷氣照烚也，火鍋店一年四季都咁旺場。韜韜話打邊爐最緊要係個爐，但位於北角的掏心窩就話你知，打邊爐最緊要係個湯底。掏心窩的湯底，除咗簡單清湯到矜貴乾隆醉雞鍋，仲有唔少特色口味如海底椰海鮮雞鍋、大白菜豬肺鍋，不得不提招牌蒙古鴛鴦鍋，一共用30多種香料製成，帶陣陣孜然粉香味，搭配肉類有食緊蒙古燒烤嘅感覺。
湯底為輔，食物為主，打邊爐始終食牛肉先最過癮。食厭肥牛，偶爾想試試靚貨，今日剪低coupon，由即日起到6月11日到掏心窩，即送美國安格斯牛頸脊一碟，全部牛肉有柯打先切片，非預先切好，所以品質較好。除咗牛肉用靚貨，店舖供應的食物，都會細心處理過，簡單如一包烏冬，很多店舖多剪開膠袋就算，掏心窩揀選稻亭手打烏冬，師傅先用熱水淥過，再過冷河攤凍，食落更爽口煙韌。還有店內手打丸子，亦由師傅即整，鮮味!
美國安格斯牛頸脊$88
肉質特別滑，口感鬆軟又腍身，不韌無起渣。油花分佈均勻，滿口濃香的油甘味。
皇上皇$88
店舖招牌水餃，水餃皮很薄，包着上海中蝦、木耳和少許豬肉。蝦肉夠多又爽口。
飄香墨魚丸$68
墨魚丸即製手打，配合榴槤作餡料，咬口有嚼勁。
蒙古鴛鴦鍋$68
用上花椒、姬茸冬菇等30多種香料煲成麻辣湯底。
掏心窩（27287038）
北角北角道10號亞太商業中心2樓
掏心窩送美國安格斯牛
《蘋果日報》讀者憑此優惠券，由即日至6月11日惠顧掏心窩，即送價值$88的美國安格斯牛頸脊一碟。
條款及細則
．此優惠只適用於即日至6月11日止。
．必須憑報紙上的印花參加，影印本及網上列印本無效。
．結賬前須出示此優惠券。只限堂食。每枱每券限用一次。
．掏心窩保留此優惠券之最終使用權。如有任何爭議，《蘋果日報》概不負責。
日本和牛長龍火鍋
每次去apm4樓搵食，總見牛陣人氣爆燈。開業兩年終於衝出觀塘，早前進駐太子始創中心。這家日式火鍋店，由日本的但馬屋集團經營，將日本大熱的ShabuShabu和Sukiyaki火鍋引入香港。翻開餐牌，湯底選擇不算多，只有清湯、Sukiyaki、鐵觀音和豆奶湯底四款，不像港式湯底般跟大量食材配料，保留日式湯底般清澈見底，那就不怕牛肉無故「失蹤」。叫得牛陣，主角當然是牛肉，不過沒有肥牛，而只有澳洲安格斯牛肉和日本和牛。以和牛做火鍋，感覺上有點浪費，總經理江頭先生笑言大讚「咁先食得矜貴！」但價錢卻實惠，晚市的和牛套餐每位$240（跟清湯）起，以放題方式經營，90分鐘內任叫任食，再實惠點亦有，澳洲牛肉套餐每位$100，難怪一班牛魔王常來朝聖，這就是排長龍之謎。
特選日本和牛
肉質細嫩無渣，和油花一起在嘴裏化開，甘香非常。上級和牛火鍋套餐（跟Sukiyaki湯底）
成人$320
小童$290
日本和牛
和牛火鍋套餐（跟Sukiyaki湯底）
成人$260
小童$230
Sukiyaki鍋
日本傳統壽喜鍋，涮過牛肉後再沾雞蛋。
上級澳洲牛肉
來自澳洲安格斯牛，揀選牛肩和牛脊，肉質較滑身。
牛陣上級火鍋套餐（跟鐵觀音湯底）
成人$160
小童$130
澳洲牛肉
安格斯牛腩位部份，味道較日本的淡口。
牛陣火鍋套餐（跟鐵觀音湯底）
成人$120
小童$90
鐵觀音鍋
鐵觀音茶葉加日本豉油和秘料製成，味道帶茶香，牛肉添幾分甘潤。
牛陣（26259234）
太子彌敦道750號始創中心地庫
