立會訪粵團星期五出發，泛民五個「無證」議員噚日去上環中旅社申請一次性回鄉證，何秀蘭舊證05年到期，佢辦手續時，千叮萬囑有關人員，如果申請不成功，都一定要退回回鄉證畀佢，唔好沒收，因為呢本舊證好有紀念價值。
唔識填表冇帶相
何秀蘭最後一次以此舊證返內地係97年11月，99年佢同涂謹申上京反對釋法被拒入境，自此禁足大陸，「如果今次唔批新證，又沒收埋呢個證，咁就唔抵嘞！」幾個人申請時雞手鴨腳，仁哥同高達冇預備相片，要即場影，填表時要申報上次入境日期，高達話耐到唔記得，唔識填。
雖則有關方面表明今次只批一次性證件，不過幾個議員仍抱一絲幻想，同時申請埋10年期回鄉卡，連同快證附加費，總共要畀910元，人人都牙痛咁聲話貴，不過中旅社話不成功不收費，即係可以退款。如果一切順利，星期五下午2時前可取證，立法會秘書處會代領證件，之後就出發北上，幾個議員都話有心理準備攞唔到證，因為之前長毛已有前科，上咗車都要被打回頭。