由吳彥祖、尹子維、連凱同陳子聰組成嘅alive唔經唔覺已經成立咗兩周年，前晚佢哋喺中環搞咗個派對，不過吳彥祖唔喺香港，所以冇嚟到。由於到場嘅嘉賓陽盛陰衰，所以經過悉心打扮嘅黃婉伶（Race）一出現，即成為全場焦點。
前晚Race新歡舊愛向佐同伍允龍聚首一堂，不過佢對向佐就明顯避忌得多，除咗聲稱唔知佢到場外，兩人仲前後腳出現，反而Race對伍允龍就明顯大方得多，佢哋仲齊齊以黑色情侶裝出現，擺明唔驚向佐呷醋，Race話：「我啱啱同伍允龍食完飯，我都唔知佢（指向佐）嚟，如果係就唔會差幾分鐘啦，起碼半個鐘。」Race強調唔驚同伍允龍飯敍會激嬲向佐，仲話佢哋都只係緋聞男友，至於點解唔同向佐食飯，Race話：「唔好咁複雜，大家係好朋友，最近忙拍戲同做唱片，總之大家各有各忙。」
冇時間探媽咪
噚日母親節，問Race有冇送禮物畀向太？佢話買咗禮物畀自己媽咪，佢話：「買咗對耳環，原本想返新加坡探媽咪，因為好耐冇見過佢，但係我抽唔到時間。」