美少女廚神A.Lin一道黃金飛魚（粟米斑塊），冧到水鬼方力申即場加分。呢日我哋借嚟一架改爆MINI，A.Lin試過後唔驚快，仲話夠刺激，梗係啦，240匹＋Turbo，一樣如飛魚般矯捷靈活，襯番拍攝時嘅閃閃夕陽，直頭係黃金飛魚嘅現實版啦。
記者：徐影龍
攝影：王文忠
心急o靚妹怕人慢
今日篇稿，本來注意力集中喺改爆240匹嘅MINICooperS，不過車主低調唔願上鏡，搵咗個朋友頂影相，碰啱就係美少女廚神A.Lin（裴殷），今勻真係車版黃金飛魚重現，多少帶點緣份。「上次我碟黃金飛魚都不知幾受歡迎，班美味天使喺後台食到乾乾淨淨。家我籌備緊出寫真集，要到七月先考車牌，買乜車都係等考到牌先諗，不過我本身都好鍾意MINI，細細架又易啲泊車。」咁會唔會買有Turbo嘅S？「咩叫S？咩叫Turbo？家坐緊呢架已經好快囉，太快又唔係幾好嘅，但又唔好太慢喎，事關我啲工作表排得好密，經常超趕，若遇到前面啲車慢吞吞頂住，會超，兼且會妖佢。」今日呢架梗係快喇，將部本身已經有175匹嘅MINICooperS，谷到上240匹，千零轉爆Turbo，好多新手往往就係被呢下突如其來嘅馬力提升，搞到手忙腳亂，美少女廚神咁急性子，都係揸番無Turbo嘅Cooper穩陣啲喎。
彎路未達極限
呢架改版CooperS，馬力比原廠提高四成，硬生生谷到上240匹，全因加入大堆改裝補品，睇見車主張改裝List，九成針對Performance。近30項改件以Alta為主力，埋單花近10萬，單單同引擎相關嘅就花近5萬，由Intercooler、19%SuperchargerPulley到電子整流同油門加速器等，改得都改。走完一段西貢、大清，直路加速真係無嘢講，上大斜行新西貢公路時最試到真章，坐爆四個人依然2,000轉前着Turbo，轉數同時響聲亦好順耳，唔似夾硬谷起副偈。MINICooperS有細車嘅靈活，遇着彎多又雙線行車，攻彎依然咬地無「波Out」，制動效果又係改得好好，換上歐系車友最愛嘅BilsteinPSS9絞牙避震，設9段式調校，車主仍未Set到最硬，雖入彎速度同弧度肯定未到極限，不過已有飛魚般嘅靈活跳脫風範。
①A.Lin七月考車牌，預咗自己一得閒就遊車河減壓。
②前排OK舒服唔頂腳，但高人上落後排頗辛苦。
③頭冚下有大量Alta改件，仲加埋頂Bar，擺明戰鬥格。
④車頭本身好靚，車主只稍將3個入風位換上碳纖。
⑤駕駛艙無乜改動，只將中控台面板換埋碳纖。
⑥雙出式尾喉搭鐵網狀尾泵把，極具跑味。
⑦MINI專用Pivot油門加速器，細啖油已有不俗加速力。
