全球爆發豬流感疫潮，好多香港人不期然諗番03年沙士一疫，相信尤以煲呔感觸良多，因為嗰陣本來係佢事業低潮，被老董派去做全城掃街大隊長，點知因緣際會下揸完掃把就紮職，畀佢得償所願做特首。噚日輪到下任特首大熱唐唐出場，統領成班高官上演全城清潔騷，但唐唐始終難脫公子貴氣，係咁派吓防疫包就算，未有突破性演出。
全程錫身齋睇唔做
噚日個全城清潔日，成班高官空群出動，去唔同地方做騷。有煲呔嘅成功例子珠玉在前，大家都引頸以待，想睇吓晨早去咗深水埗保安道街市嘅唐唐點樣揸掃把。但唐唐始終係公子哥兒，自細十指不沾陽春水，揸紅酒杯多過揸掃把，始終有鋪身嬌肉貴嘅王子病，所以全程都只係行行企企，企喺度睇住啲清潔工洗街，同向在場嘅市民派吓有毛巾同洗手液嘅防疫包就算。
唐唐交唔足戲，但做細嘅始終唔敢唔出力。好似民政事務局嘅德成局長咁，去到旺角，好衰唔衰有個地區人士遞把掃把同手套畀佢，仲叫局長不如示範吓，曾德成惟有拎起支掃把洗吓平台，戴起手套擦吓簷篷咁。咪以為德成局長思想左傾，但原來左右手都非常靈活，有人問佢揸過掃把未，佢即刻話自己兩隻手同時揸兩把掃把都仲得喎。
勞工及福利局局長張建宗就唔使咁操勞，佢去牛頭角上邨探訪居民，真人示範教個長者點戴口罩同用消毒液。但要數當中做騷做得最落力最投入嘅，自然係煲呔口中好打得嘅發展局局長林鄭，佢戴起手套同啲義工一齊清潔青衣海濱嘅康樂設施，擦得好鬼出力。平時一副女強人模樣嘅公務員事務局局長俞宗怡亦唔輸蝕，着住帆布鞋、polo恤嘅D姐去到西環探訪一位老婆婆，仲落手落腳幫婆婆清潔家居㖭。
mailto:[email protected]