可能到家為止，仍然有散戶唔明點解港股呢一浪升得咁勁？豬流感爆發之初，大市跌過一陣即掉頭狂升，呢一樣嘢最令散戶摸不着頭腦。不過，睇番全球股市呢輪表現，可以話齊齊做「大龍鳳」，並非港股單方面狂挾淡友之「個別事件」。
今次港股升浪令唔少股份重新發光，就以靜過一輪的北京首都機場（694）為例，股價來個大翻身，該股今年3月初曾跌至最低2.56元，然後見底回升，走勢一浪高於一浪，以近期高位5.90元計算，累計升幅達130%，可謂大幅跑贏大市。
候5-5.2元吸納
首都機場最近發佈4月份飛機起降架次及旅客吞吐量的初步數據，分別約4.04萬架次及約550萬人次，按年分別升14.7%及14.9%；但貨運量則下降11%至10.78萬噸，其實情況並非太差。
雖然營運數據尚可，想買首都機場不妨再等多一陣，因該股由3月初至今升足兩個月，點都要唞唞氣，建議待回落至5至5.20元才考慮，中線目標7元，失守4.20元止蝕。
方星俠