甚少有時間睇電視嘅敏妮，前幾日要清年假，可以偷得浮生半日閒，喺屋企睇電視，咁啱有機會睇到鄧萃雯嘅訪問。本來一個藝人嘅訪問冇乜特別，但佢提到自己返大陸拍劇嘅經驗，敏妮就認為，佢嘅工作態度好值得學習。
要求與付出非正比
香港人好多時面對內地同胞時，都覺得自己有份優越感。鄧萃雯話自己返大陸做嘢，要求嘅報酬同福利，都比內地演員高好多。其實唔講鄧萃雯已經係甚有名氣嘅演員，敏妮聽過好多初出茅盧嘅大學生，提到返大陸做嘢，佢哋嘅要求都比大陸人高。要求高原因唔一定係同交嘅貨有關，原因可能係「來自香港」呢個品牌，相信唔少人不知不覺間都會認為，單係呢個品牌都應該有一定premium。
當然敏妮欣賞鄧萃雯唔係因為佢善用premium，反而係佢冇加上呢個因素。佢話內地唔少演員都係學院派，個個都有本事，佢作為香港演員，要求報酬咁高，更加要交足貨，唔好俾人覺得你只係識要求，但冇料到，咁樣會影響日後香港演員嘅「品牌」。
盡力保護個人品牌
的確，好多人要求高係一回事，自己交嘅貨未必同「要求」成正比，好多時要求100蚊，交嘅貨只係值80蚊，甚至更低，當時可能係賺咗，但做壞咗自己個名，之前嘅premium就會越嚟越收窄，最後可能要有discount人哋先搵你。同樣嘅工作態度，放喺任何行業、職位都啱用。
其實唔一定開公司做生意，一般打工仔都有自己個「品牌」──就係佢本人，做嘢唔好單係為交差，最緊要記住做乜嘢都係為自己個「品牌」而做，到日後你老闆想升人，或者你自己想轉工跳槽時，就知呢個「品牌」有幾重要。
溫敏妮
http://wanmanli.com/blogs/