輔警總監郭志舜明年9月就退位讓賢，由副總監、藝人姚嘉妮嘅老竇姚仰龍坐正。郭Sir當然有啲唔捨得，尤其係佢過去幾年都有份策劃同部署香港幾單大事件嘅保安工作，包括05年世貿會議、07年回歸10周年同舊年奧運馬術賽等等。
至少講咗14件大事
郭Sir早前講開輔警成立50周年嘅慶祝活動同嚟緊嘅招聘計劃，就順便同八方上咗課輔警歷史。郭Sir由66年天星小輪加斗零引起動亂開始講起，中間經歷79年大批內地人湧港、89年北京戒嚴之後百萬港人上街、97年回歸，以至舊年8月喺香港舉行嘅奧運馬術賽同火炬傳送，單單對警隊嚟講都係一大挑戰，當然輔警都出過唔少人力協助正規警察。八方粗略統計過，郭Sir至少講咗14件大事，足足講咗一粒鐘，但一啲都唔覺得悶。