上星期三與星期四凌晨三點有大賽舉行，豈能錯過，三點鐘就起身睇波，本以為阿仙奴對曼聯有睇頭，點知起身稍遲，開着電視，已見曼聯領先二比零，有兩個作客入球，而第一場已贏一比零，即係阿仙奴要反勝四比二先至掂，點打呀，果然見到阿仙奴球員士氣盡失，曼聯踢得穩陣，場波好悶啫，半場未踢完，想話再上床瞓覺，但睡意已失，慘也。
星期四及時起身睇波，車路士對巴塞，好睇好多，車仔唔贏唔抵，點知臨天光瀨尿，補時最後分半鐘畀恩尼斯達射入，呢腳波其實係巴塞全場唯一一次真正射門，真係天亡車仔，唔怪得球場哭聲與狂笑聲並起，左丁山睇到，都幾乎由梳化跌落地。
睇波吖嗱，到星期五已經冇晒精神，頭重重，醒起自己已非十八廿二，捱更抵夜係唔得嘅啫。上到陸羽飲茶，餐飲M提起許淇安逝世，語帶唏噓，點解要講呢？醒起許一哥生前係陸羽常客，逢星期五就與一班老友在房間內聚會。最後一次見佢係幾時呢？餐飲M好記性，話係警察大陣仗搜查「住好啲」嘅疑似黑社會術語T恤之後，當時佢問過許一哥有何評論，警察點解要咁大陣仗，許一哥畀咗一個答案，十分幽默。許一哥係好傾之人，六十五歲就過身，未免太早，可惜之至。
餐廳羅話不如講波，以免自己驚埋一份，憂心癌症。講波不離車仔對巴塞，《泰晤士報》講陰謀論話挪威球證執行歐洲足協會長柏天尼之暗令，唔想英超聯球會壟斷決賽，故意吹死車仔，有四個可以畀十二碼嘅機會，全部視若無睹，等車仔唔可以贏到二比○，盡量給巴塞一個起死回生機會。餐廳羅話車仔在最後階段，戰術錯誤，唔趁球證誤判巴塞後衞阿比杜出場之時，乘機加強進攻，壓住巴塞打，反而退守半場，畀十人巴塞繼續㩒住嚟攻，飲恨歐冠盃。好彩左丁山唔係車仔擁躉，否則必定與餐廳羅拗出火花。中立啲講，咁重要嘅比賽，歐洲足協派大賽經驗甚少嘅挪威球證執法，實在於理不合，派意大利或德國球證吹雞就差唔多。到曼聯與巴塞爭冠軍之時，千祈唔好又派北歐小國小型聯賽嘅球證主持嗰場世紀大戰呀。好彩場波開波時間係端午節假期（五月廿八日凌晨），大家可以放心睇波。