蔡卓妍(阿Sa)和鄭中基(Ronald)多年的地下情漸漸浮面,前晚阿Sa出席活動時坦承已收到Ronald邀請亮相節目《美女廚房》壯聲勢,言笑間還反問記者:「咁方力申搵邊個幫手?」當記者笑指是鄧麗欣及反指難道是鍾欣桐(阿嬌)時,她即一臉尷尬說:「我係咪問錯嘢?」
李克勤、張敬軒、泳兒、裕美、賈曉晨(JJ)和陳偉霆等前晚到將軍澳運動場出席「第二屆全港運動會開幕典禮」,其中蔡卓妍身穿T恤短裙現身擔任嘉賓。近日有消息指鄭中基已邀請女友阿Sa亮相由他主持的《美女廚房》,求證時阿Sa大方直認的確收到邀請擔任嘉賓,現在公司正在度期,阿Sa表示不抗拒,只要有空檔便會參與。
「大家開心冇所謂」
若阿Sa亮相定必成為全場焦點及被玩對象,她表示已做好心理準備,還笑說:「唔緊要,犧牲小我,只要大家睇得開心就冇所謂。」
談到主持皆會偏幫自己的緋聞情人,阿Sa聞言笑問:「係咪真㗎?不過都唔需要,唔需要特別對待,好唔好味照直講就得,最緊要夠真,我煮嘢唔係大問題,反而擔心要面對觀眾。」記者指屆時可以找人幫忙,甚至可以找Ronald出手,但阿Sa直指他是主持,理應不能出手幫忙。
阿Sa還反問現場記者:「咁方力申搵邊個幫手?」記者笑言當然是鄧麗欣,莫非阿Sa想他找好姊妹鍾欣桐(阿嬌)?她聞言即一臉尷尬說:「我係咪問錯嘢?」會否真的考慮請阿嬌一同亮相?阿Sa表示若成事才再考慮。她的新碟《二缺一》銷量達白金(3萬張),唱片公司加推第二版5,000張,內有不同造型靚postcard給歌迷珍藏。
克勤為家英加雙筷
同場的克勤表示原定近日要往美加登台,但現在押後,內地演出亦延至8月,還會趁這段時間留家湊仔,昨日母親節他表示一家人會留在家打邊爐。另外,他又表示有SMS恭喜阿姐汪明荃和羅家英結婚,但對方未回覆,他透露阿姐不時來他家作客食飯,現加多一個羅家英會更熱鬧。
採訪:卓寶花
攝影:陳志嵐