大批印有「VIIV」的神秘貼紙，最近在中、港街頭湧現，令人聯想到是「六四」的羅馬數字，有網民更把它演變成不同的圖案，印製Ｔ恤。大家都在競猜，誰是「幕後黑手」？
謎底終於揭開，原來是一班本地的設計人、藝術家自發的六四搞作，為他們今日凌晨零時在網上推出的免費《VIIV》漫畫造勢。記者：陳沛敏 雷子樂
這個春夏之交，很多人蠢蠢欲動，在支聯會、天安門母親等傳統悼念活動以外，自動自覺發揮小宇宙，用自己的方式自我的風格，重現20年前的壯闊，憶念8964的哀思。
不少人初時以為，街頭乍現的「VIIV」貼紙，跟內地女網民在網誌發表的「VIIIIXVIIV」（即8964）T恤有關。《VIIV》「幕後黑手」之一的bLYHn（行走江湖的藝名）澄清，只是大家不約而同用上類似的概念，兩者其實沒有直接關連。做設計工作的他解釋，VIIV計劃早在去年底已成型。
資源有限 網上宣傳
「有個支聯會會員搵我哋，想我哋幫手度啲新嘢，舊年11月present咗幾次，但華叔佢哋唔係好接受。」支聯會沒興趣，他們決定自己來，分工合作印貼紙、製Ｔ恤，先來一場宣傳攻勢，「印咗一萬張貼紙派畀朋友，有啲朋友拎咗返大陸貼……呢啲係Guerillamarketing（游擊式宣傳）。」
37歲的bLYHn解釋，VIIV的設計擺明車馬想吸引年輕人，似網民常用的火星文，又像哭泣的骷髏頭。「唔使用好多錢，成功引起注意，網上都好多人討論。」細看貼紙上還寫有「110509」一串數字，預告貼紙只是前戲，高潮在今日。
在非常有限的資源下，12人搞宣傳，另外四人不眠不休幾個月，炮製這本170頁的漫畫，「佢哋本身仲有正職。原本想將漫畫印成書，但資金有限，搵過出版社贊助，但冇乜回音，六四前搵到我哋都仲想印。」
bLYHn在加拿大出生成長，但父母從小教他中國歷史、文學、美術，六四鎮壓時他念高中，「突然覺得嗰個中國唔係我認識嘅中國，有被出賣嘅感覺。到家中國想做強國，但除咗政治、經濟、軍事，做強國仲要有道德權威。好似當年德國二次大戰後，要成個國家民族去承認納粹嘅罪行，先可以建立返自己嘅地位。」
「共同理想是民主」
VIIV的另一搞手NY.ben（藝名）只有22歲，從小學到中學，老師沒講過六四是怎麼一回事，直至近年媽媽帶他去遊行，他才開始找資料，重新認識那段歷史。「我以前唔係太鍾意內地人，覺得佢哋粗魯，但睇返20年前嘅中國人，覺得佢哋好勇敢、好犀利，好似提出『我們的共同理想是民主』。」
「中國家只係金錢上、硬件上進步。我覺得如果六四平反咗，中國會更進步，係軟件上嘅進步─20年前嘅中國人，好似企喺坦克車前面嘅中國人，會返番嚟。」
故事大綱：勾起共同記憶 《VIIV》網上下載
時空是2009年的香港，主角是平凡的中學生，卻患上怪病，一觸摸身邊的東西，就會勾起與這些東西有關的記憶，頭痛欲裂，平日都要戴上手套。
政府突然對低過一定分數的學生實施分級強制補習，最低分的甚至要送去指定的補習營隔離補課。另一主角認為不公平，發動遊行、示威、絕食。最後，卻遭受政府血腥鎮壓。
故事的發展似曾相識，有些插圖是真實的新聞照片，令人想到20年前的一段青春殘酷物語。結局告訴讀者，這些事情確實曾經發生，不是在09年6月4日，而是89年的6月4日……
下載《VIIV》可到
http://www.sendspace.com/file/dw0e03或
http://www.badongo.com/file/14852692
《VIIV》漫畫節錄
