香港抗疫小勝一仗，煲呔急不及待現身幕前攞彩。官場中人話，贏呢場仗，幕後功臣係食衞局副秘書長陳松青，佢上司常任秘書長李淑儀都居功不少。
提早體檢獲好評
豬流感殺到，煲呔掛帥主持大流感應變督導委員會，由陳松青做秘書，官場人士形容佢做事謹慎、細心、勤力，加上佢係李淑儀頭馬，所以搵佢做「抗疫小隊長」。封酒店稍有差池會被輿論狂轟，因此煲呔指令李淑儀千祈要睇到實，陳松青壓力巨大，據講同下屬首席助理秘書長陸嘉健過去一星期幾乎晚晚通頂，日以繼夜由朝做到晚，凌晨兩點，甚至天未光五點鐘都有發出電郵畀各部門。
維景解封前，李淑儀更急call「武林大會」，召集多個部門近30人部署解封措施，據知最初安排係等到晚上8點半鐘，隔離令屆滿後先為旅客檢疫發出健康證明，有人指旅客心急離開，建議提早體檢，一夠鐘就放人。
值得一提嘅係新聞統籌專員何安達，佢認為應表揚成功識別中招墨西哥人嘅律敦治醫護人員，所以醫管局特別拍攝訪問片段供傳媒播出，打咗場漂亮公關戰。