「搞錯呀！又話戰爭片，回水呀。」當《華爾基利暗殺行動》上畫後，我係好憎見到這類留言，老實講句︰「喺今時今日網絡年代，乜仲有人唔知自己將會睇乜就衝入戲院咩？」難道講戰爭就一定要似《雷霆救兵》般槍林彈雨？正所謂話不投機半句多，如果你真係想了解一段鮮為人知、真人真事改編的二戰小插曲，這隻Blu-ray睇得過。
記者︰陸俊雄
攝影︰梁細權（Product）
掃射聲入心肺
對於一班希望見到屍橫遍野亂槍掃射的朋友，唔好意思，只係得開首無耐，講靚佬湯飾演的史陶芬貝格上校，在非洲被突襲的一幕。他正向上司出謀之際，突然有飛機殺到，向地面「啪、啪、啪、啪」亂槍掃射。差不多的畫面在《澳大利亞》中後段出現過，但《華爾基利暗殺行動》出來的聲效，實在好好多；聲音由遠到近追埋嚟，雖然短短一幕，用來試機也不錯，聽聲都覺得痛。但之後大家就要收拾心情，坐低慢慢咀嚼對白或字幕，因為佢係一套劇情片，而並非一齣瘋狂死人的視覺享受。
口水戲為主
這套的確是口水戲，同近期好多套奧斯卡提名電影一樣，係玩氣氛玩張力。其實就算唔係讀文科歷史出身，都知道希特拉唔係咁死，即是事先張揚成件暗殺事件係失敗告終。難就難在要將呢段就算讀過二戰史，但都唔係好記得有史陶芬貝格呢個人的小小插曲放到咁大。個人覺得套戲係有不足的地方，例如點解要用史陶芬貝格？在非洲死唔去但變了獨臂獨眼，就代表可以上位同值得信賴？呢方面導演係交代得好唔清楚。不過，唔想翻查史書，而又忽然好學想知少少，即使係好表面咁認識，睇電影始終係一個費時不多的代替品。
輸在明哲保身
「華爾基利」呢個名好多人都彈過譯得非常差勁，不過呢方面留番畀文化人研究，只想睇戲的人，知個名係指一道當希魔一死，就會啟動後備軍保納粹政權的密令已經夠。真實的歷史希魔係自殺死，史陶芬貝格上校嗰一方自然係唔成功。不過佢哋輸，唔係輸在個炸彈威力唔夠，而係輸在自己人，在危亂時仍然想明哲保身，從古到今，人就係咁。所以那班反希魔的高幹，到底係咪真心為國，我個人係有所保留。最後唔怕話埋你知，史陶芬貝格係要死，而且最尾被槍決時，靚佬湯那個帶點驚、唔想死住的表情，係非看不可。
