戲如人生，人生如戲，當你好似人稱「九記」嘅九紋龍一樣，闖蕩江湖幾十年，你就會更加明白人生如何像一部電影。《烈火戰車》主角華弟嘅現實版，斷手斷腳又昏迷，玩電單車玩到女友走佬，最終都領悟到對快樂嘅要求係會改變。家嘅九紋龍唔愛戰車愛綿羊，死氣喉要樣唔要聲，呢本看破江湖嘅活字典裏面，相信只有「開心」呢兩個字。
記者：許維雅
攝影：陳陶鈞
烈火戰車變 乖乖羊
家係Disco搞手嘅九紋龍，無九條龍紋喺身，真名都無一個字係同個九字同音，對於充滿江湖味名字嘅由來，笑着帶點隱晦地解釋，「我哋十三個兄弟，我排第九，個個就開始叫我做九記，後尾有埋九紋龍呢個名。」逐漸對個九字情有獨鍾，帶出嚟影相嘅三架電單車，貼紙、車牌通通都要有個九字。
我理所當然地認為，九紋龍加自家珍藏，當然係辣車加紋身，點知……「你估我係細個嗰時咩，戴住條大金鏈出街，家Disco揸fit人要搞笑㗎，自己開心，大家又開心。」無錯，見到九記嘅電單車珍藏竟然唔係烈火戰車，而係綿羊，已經夠晒搞笑，「華弟戰車？後生時我都有，第一部戰車就係YamahaRD350，早過劉華飛㖭啦。斷手斷腳試過，炒到昏迷又試過，後生時迷車迷到廢寢忘餐，搞到女朋友都走埋佬。不過人大咗，心態唔同咗，我已經過咗年少氣盛求速度嘅年代，可能叫返璞歸真啦，所以家鍾意玩綿羊，一樣咁自由自在，搞到佢鬼五馬六，人哋望到會笑就大家開心啦。」
好色 要樣唔要聲
家有三架四個轆、三架綿羊仔、兩架單車，玩車玩足幾十年，珍藏口味改變咗，改車心態亦轉變埋，「七、八年前見到人哋玩復古綿羊，就開始迷上改車玩外表，整到啲車古靈精怪，大人細路行過會望就好開心。年紀大乜都睇化晒，人生最緊要繽紛、充滿色彩，Forfun，所以特別鍾意啲五顏六色嘅改裝，宗旨唔係要快，最緊要怪。」睇佢啲綿羊架架都幾支粗大尾喉，好嚇得，但原來都係虛張聲勢得個Look。雖然主力玩外表，但一旦迷上改車，其實真係可以改到你窮，二萬幾蚊嘅綿羊仔，改裝費都足夠買多部，唔肉赤咩？「改車都好過攞啲錢去賭吖，所以我戒咗賭、戒咗食煙飲酒、戒咗蒲，千杯不醉又如何？玩吓改車仲開心啦。」開夜場但聲稱已戒蒲，真係唔知九記邊句真，唯一肯定係佢嘅人生同改車目標一樣最緊要Fun。
SYMFighter150ZR紅白藍風
改裝特點：車尾加裝三支特粗嘅死氣喉同電鍍殼做裝飾，避震、煞車卡鉗襯埋色，換埋皮椅玩紅白藍色調主題。
改裝費：2萬至3萬元
YAMAHACygnusXFi125 6支死氣喉
改裝特點：避震、煞車卡鉗同皮椅等好多配件都係九記揀色，然後訂做，加裝音響設備，最搶眼係車尾嗰6支死氣喉裝飾。
改裝費：3萬多元
SYMMegalo125玩貼紙
改裝特點：最特別嘅地方就係無乜點改！淨係加咗個尾箱同貼咗啲貼紙，想保留番原汁原味咁話。
改裝費：數百元
綿羊Styling最緊要獨特
同九記相識十年，改車改到做埋老友嘅匡哥，鬥車改車都有二十年經驗，對改車潮流瞭如指掌。「唔同年代改車嘅潮流都唔同，以前法例無咁緊，好多玩速度玩飛車，但家揸得快要坐監，咁不如玩外表。好似同綿羊仔做Styling咁，我會針對個客嘅要求，用電腦草圖畀佢哋睇先落手改，有時自己設計後，再搵廠人手做出嚟，之後仲要慢慢磨合到可以放落部車度，咁先夠獨特。」
查詢：新匡明電單車中心（23971144）