抗疫第一擊落幕，輪到特首暗戰揭開戰幔。煲呔早前宣佈推出全城清潔大行動，動員市民搞衞生預防豬流感，第一場洗太平地大騷今日上演，多個司局長分別落區洗地掃街執垃圾，推廣清潔防疫，人人有責。
唐公子好叻揸掃把
由於煲呔都要做過「掃街大隊長」先能夠登上特首寶座，因此今次全城清潔大隊長之位，直情係下任特首前哨戰。大熱門唐英年當仁不讓，搶韁出閘，今朝會去到深水埗保安道街市拎起掃把掃地，雖然佢出身富貴，官邸大把工人侍候，不過知情者指唐公子揸掃把嘅手勢，同揸紅酒杯一樣咁純熟，「掃街大隊長」之名絕對孭得起咁話。
其他局長亦紛紛落區，發展局局長林鄭月娥會去青衣海濱公園，一向「好打得」嘅佢，唔知洗地得唔得呢？根正苗紅左到痹嘅民政局德成局長，曾經寸爆陳太忽然民生，今次輪到佢自己忽然衞生，去旺角洗衣街搞清潔，一於學足雷鋒精神，做個好幹部，為人民服務。
政府話趁母親節舉行「全城清潔日」，係要凸顯家庭參與嘅重要性，因此要動員多個局長，勞工及福利局局長張建宗會去牛頭角執垃圾，環境局局長邱騰華就到九龍城街市洗地，運輸及房屋局局長鄭汝樺則入元朗天恩邨搞衞生。至於其他司局長今日暫時未出手，唔係佢哋可以免役，而係全城清潔大行動陸續有來，其他高官稍後出動都未遲，事實上香港藏污納垢地方多的是，高官要洗太平地，又使乜擇日吖！
兩隻黑馬未有動靜
至於煲呔本人，由於已貴為特首，因此掃街大隊長都係留番畀其他人做嘞，佢又冇得再連任，唔使再爭啦，反而佢位好兄弟、財爺鬍鬚曾暫未有動靜，噚日負責簽署CEPA補充協議。八方見到唐公子企喺後面見證簽署儀式，可能百般滋味在心頭，人哋簽CEPA，佢就揸掃把，都幾冇癮㗎。
「疑似特首候選人」梁振英早前就防疫抗疫時有意見，似乎虎視眈眈掃街大隊長工作，近日香港有豬流感確診個案，佢卻冇晒聲氣忽然潛水，唔會玩自我隔離啩！？八方相信佢好快就蒲頭，揸掃把，得天下也！
mailto:[email protected]