六四20周年，前塵往事不敢回憶，未能忘記，屠城時身在北京嘅資深新聞工作者陳潤芝，忍痛揭開傷口，出版新書《六四二○》再檢視歷史嘅人和事。
事隔20年，我哋對歷史應該了解更多，事實卻係更多人選擇忘記歷史，甚至歪曲歷史。陳潤芝重訪當年參與其事嘅人，由佢哋講出歷史究竟係乜嘢一回事。營救民運人士嘅「黃雀行動」幕後黑手陳達鉦至今無悔，「救人一定比殺人好，六四總有平反一天。」
黃雀行動可以話係六四歷史最神秘一章，陳達鉦透露當年策劃行動前，寫咗17頁計劃書，行動策略全部引用毛澤東戰術，「戰術上重視敵人，戰略上蔑視敵人，永遠保持自己在暗，要救的人在明，保護自己。」