今日是5月重要節日母親節，為人子女都一早mark低預留這日慶祝。徐濠縈等着收女兒康堤「爆響口」會送給她的彩色襪，未收到手已經甜絲絲。ECupBaby（劉欣宜）則既拜大廚學藝親自炮製大餐給母親品嚐，又送上鑽戒，但是劉媽媽最想的則是女兒能除下「ECupBaby」這稱號。鮑起靜的女兒則到了外地讀書，難怪她叫大家珍惜與父母相處的時刻。
徐濠縈等收康堤襪仔
潮媽徐濠縈與寶貝女康堤（包包）及徐媽媽今年會三代同堂一同慶祝母親節，阿徐媽咪前日（周五）開始在陳家過夜，阿徐透露送給媽咪的禮物是「任媽咪點唱」，自己也一早知道包包會自製一對襪送給她，她說：「因為幾歲人仔唔識乜嘢叫驚喜，反而一早爆響口話『媽咪，我整緊對襪畀你』、『媽咪，我家油顏色，你要乜嘢色呀？』其實，我日日都係母親節，因為包包成日都畫畫送畀我，佢畫嘅內容都離唔開畫我同佢，之後加IloveyouMummy、Ilovemyfamily，細路仔畫嘅畫都係反映佢嘅生活，即係話我真係畀到一個美滿家庭佢，呢一點我最proudof。」
採訪：梁錦貞
ECupBaby封胸敬母
以34E作賣點的ECupBaby，日前與媽咪到中環慶祝母親節，她拜大廚HarlanG為師，炮製龍蝦天使麪和甜品孝敬媽咪，還送上鑽戒。
兩母女同樣身材豐滿，劉媽媽否認在囡囡發育期狂谷她，她直言抗拒女兒經常拋胸示人，也不喜歡ECupBaby這個稱號，她說：「除咗呢個名最好，始終囡囡仲細，唔好咁快定咗型行呢條路線，我都唔贊成佢着得太性感去接job。」難怪ECupBaby宣稱要封胸。兩母女年齡相距29年，但絕無代溝，ECupBaby只嫌媽咪是白天哦，劉媽媽說：「佢人生經驗少，我成日哦住只係想提點佢。」
昨日ECupBaby與媽咪齊出席活動，劉媽媽開心展示乖女送給她的母親節禮物鑽戒，ECupBaby說：「隻戒指唔係好貴，4位數字啫，不過已經係我送畀媽咪最大份嘅禮物。」採訪：比華利、何永寧
攝影：陳順禎
髮型：Hata（Chin.G）
化妝：KathyL.（CiaoBella）
場地：TUSCANYbyH
徐淑敏阿媽變Fans
徐淑敏（Suki）身為徐家孻女，甚得媽咪痛錫，為報答母親養育之恩，兩母女日前到尖沙嘴慶祝，Suki為媽咪配搭衣服，全程擔任形象指導。
徐媽媽表示一向對Suki管教甚嚴，但當女兒決定加入娛樂圈，她還是全力支持，她說：「睇到囡囡今日嘅成績，我都好滿足。」更大爆近日每晚都狂煲女兒有份演出的《巾幗梟雄》，她說：「有時睇到佢戲中俾人蝦，我都會喊起上嚟。」
採訪：比華利
攝影：林德雄
場地：Nijibistro
楊思琦蛋糕冧母親
楊思琦表示每年母親節都會送上康乃馨給媽咪，日前便帶同媽咪到花墟選購，楊媽媽大讚女兒十分孝順：「佢各方面都令我好放心。」思琦表示今年除了送花及請食飯慶祝外，早前已送上一個親手做的母親節蛋糕，她說：「之前幫無綫拍咗個母親節特輯，咁學整咗個士多啤梨蛋糕，因為自己平時好少下廚，所以媽咪收到都好開心。」
對於思琦首次送上親手做的蛋糕，楊媽媽笑言未食已甜在心頭，又表示早前有收到思琦親手做的手鏈，令她十分感動，她說：「佢平時工作已經咁忙都咁有心思，呢份心意係用錢都買唔到。」
採訪：王崇穎
攝影：陳志嵐
服裝提供：celynb
鮑起靜千里連女心
金像獎影后鮑起靜和丈夫方平育有一名女兒Eva，兩夫婦視女兒如珠如寶，Eva在17歲便到英國讀書，每年母親節，兩母女都會通長途電話，鮑姐說：「雖然佢唔喺身邊，但只要喺電話聽到佢把聲就好開心，最緊要知道佢平平安安。」
問鮑姐對女兒有甚麼期望，她說：「我希望佢做個平凡又幸福嘅人，平淡是福嘛。」近年女兒交了男朋友，她說：「佢話兩年後會返港發展同結婚，我好期望呢一日。」鮑姐呼籲為人子女要珍惜與父母相處的每分每秒，她說：「唔好用工作忙做藉口，只怕有一日父母離開，想孝順都嚟唔切。」
採訪：比華利
