會長Ｃ請吃午飯，到「喜萬年」食燒豬，地產Ｆ係食家，最鍾意周圍去試菜，唔喜歡只係光顧富豪飯堂，但佢係真正富豪級，勝在十分低調，坐在茶餐廳、大牌檔都好，永冇記者會影佢相。地產Ｆ話「喜萬年」隻燒豬零舍醒，有會長Ｃ請客，更係特別醒。
「喜萬年」就在灣仔維景酒店附近，遊客/住客及職員因豬流感而受隔離。外滙Ｇ話：「我哋食燒豬，究竟怕唔怕㗎？好近維景啫噃。」已經食咗落肚咯，邊度仲有得驚吖，豬肉燒到熟晒，一於冇有怕啦，如果可以嘅話，送隻燒乳豬去灣仔維景酒店，慰勞住客應該好受歡迎㖭。
在座嘅投資Ｗ係某國駐港榮譽領事，每日打電話去維景與被困在內嘅該國僑民談話，慰問一番，又出席過周一嶽局長對各國領事嘅簡報會。於是我哋一齊問佢：封鎖隔離維景酒店嘅做法，是否令佢嘅「國民」感到沮喪不安？投資Ｗ話：「冇噃，我哋有幾位嚟香港參加展覽會，咁啱入住維景，逼於無奈，留在酒店內，我每日同佢哋傾電話，佢哋話住得好安樂，香港醫護人員照顧周到，食用甚佳，識咗好多各國友人，仲叫我代佢哋多謝香港特區政府㖭。我與其他領事聽完周局長簡報後，甚為滿意，知道特區政府已盡力為所有『隔離人士』服務，不過當然可能有啲人係要鬧番兩句嘅，聽吓無妨。」
投資Ｗ做某國榮譽領事，真係出錢出力，該國是小國，領事館預算有限，投資Ｗ為該國效勞，有時外交應酬費用邊度會全部申領（claim）到足吖，舉個例，即使係大國領事，去五星酒店請客食飯，有「每人使費」（expenseperhead）嘅預算上限，譬如每人領三百蚊。想話去四季或文華呀，費煞思量㗎！投資Ｗ為咗某國，實在抵得諗，至於做榮譽領事有乜回報呢？投資Ｗ嘅生意與某國完全無關噃！
隔咗一日，維景酒店解封，投資Ｗ去酒店接番幾位國民，見到現場咁墟冚，歡樂氣氛十足，如開嘉年華會，覺得十分感動，香港特區政府卒之做番齣好戲，化危為安，化怨憤為祥和，為香港做足國際宣傳一百分，曾特首民望應該升番幾點啩？股市配合再升多一兩個星期嘅話，七一遊行人數一定減少。