民主派議員唔肯輕易就範接受中共統戰，對於訪粵團要實行「維景式」隔離措施，仲要執行規定日期、規定口岸出入境呢種「雙規」安排甚為不滿，揚言罷去，經一番斡旋，有關方面終於同意分A、B兩團先後出發，但所有議員一律唔可以提早離團，全人類跟大隊返香港。
被迫同泛民玩SM
民主黨攞到個彩，亦無意繼續為難團長曾鈺成，答應收貨出發，不過順得哥情失嫂意，家陣輪到其他充當統戰佈景板議員有微言，事關佢哋本來可以自由行，為安撫民主黨卻要佢哋接受綑綁式行程，被迫同泛民玩SM，十分冇癮，石禮謙私下更話呢種「雙規」式考察團日後可免則免，「男人一個腎虧已經夠慘，仲要雙虧，真係不人道！」
行程安排敲定，無證議員亦獲通知，星期一可以自行去中旅社領取一次性回鄉證，據何俊仁稱，以前都係由有關方面統籌辦理，張一次過回鄉證只能遠望，冇得過手，今次係第一次可以親自領取，唔知係唔係北京對佢哋又多一啲寬容。