港台昨日為「太陽計劃」舉行記者會，穿上不同年代服飾的鄭融、張敬軒、梁漢文和徐子珊等歌手在烈日當空下行紅地毯，又呆站半小時影大合照，結果眾人標汗、化妝快溶，但嘉賓則安坐帳篷下睇騷。
港台的「太陽計劃」即將舉行，昨日在總台戶外場地開記者會，難得穿上懷舊服飾的眾歌手在烈日當空下仍能擠出笑容，鄭融以宮廷裝打扮打頭陣出場，最好彩是今年擔任太陽大使的容祖兒，穿上lowcut上衣的民族打扮透心凉。另一太陽大使張敬軒，成功上位排位比梁漢文更前，又是較遲出場的歌手，可免「乾煎」之苦。
鄭融都覺得自己是全場最熱的女歌手，她說：「大會提供呢套衫畀我，覺得好焗，不過我搽咗防曬。好彩有遮喺手，雖然細又有窿，但都可以遮到三個人，我用嚟遮住徐子珊同梁思浩。」
樂壇新人徐子珊以懷舊淑女look現身，雖然她是新丁，但見她跟官恩娜、陳偉霆和鄭融等有傾有講，言談甚歡，果然是世界女。
軒仔睇住關楚耀
梁漢文很認真，半夜找服裝，他說：「太太幫我上網搵，最終着呢件70年代嘅褸。」有指古巨基不續約金牌大風，梁漢文說：「人各有志，可能基仔拎咗最受歡迎男歌手獎，另有諗法。」被問可會覺得基仔不飲水思源，梁漢文即說：「唔敢咁講，問番Paco（黃柏高）啦！唔好quote喺我度。」
另外，有傳謝安琪和軒仔個唱飛起老友關楚耀，軒仔說：「只係傳聞，我哋有演唱會點都預佢，只係呢排佢未ready，前景未明朗啫。」
採訪、攝影：王連連