港人近排談論嘅話題，唔係豬就係牛。豬仔病雖則殺到嚟，好彩威力唔算好勁；至於個股市就日日升，令人憧憬牛市就快蒞臨。唔理係豬定係牛，最緊要係人人身體健康同埋有錢搵。今期推介愛隊廣島三箭作客贏千葉市原4:2，希望可以帶挈捧場客執番多少啦！
三箭上屆喺日乙入咗99球，今屆升上日聯後，入球能力仲係咁強，10場入19球，入球數目僅次於飛腳（9場入22球）。佢哋除咗前鋒佐藤壽人有料到，連班中後場球員好似係高萩洋次郎、柏木陽介同埋槙野智章等都好掂，配合埋個3-6-1嘅攻擊型陣式，出征實力麻麻兼主場冇威力嘅市原有力大勝一場。不過，市原後衞齋藤大輔近來腳風順，而且前線嘅深井正樹同埋卷誠一郎亦有數糊能力，博三箭贏4:2。
博紅軍數韋咸5蛋
同日利物浦作客韋斯咸，牽牛認為佢哋勝1:0，但我就大膽啲，博佢哋贏5:0。利記家落後「1哥」曼聯3分兼打多1場，和波同輸冇分別，所以要搏老命。德甲賀芬咸主場對科隆，前者係冬季冠軍，但歇完冬返嚟變咗第2隊，屎到你唔信，但呢場波陣容完整，對住實力同狀態都差過佢哋嘅科隆，應該有得贏。之但係，對上5場佢哋有3場係半場輸，睇嚟頭段唔多穩陣，一於要[客/主]。
文：青蛙仔