五月三日本欄講「惡補財經」，提及新聞V出版新書，新聞V閱後來電郵，更正書本名稱係《瘋讀社論．強化英語》。讀社論，學英語，舊橋也，我哋讀中學之時，英文老師已經叫我哋睇《南華早報》與《新聞週刊》啦，《時代》啲英文太深喎。至於幾十年嚟香港中學英文老師要求學生睇英文報紙，有何成效，無人知道。新聞V夫子自道，話會極之有用，讀社論更有益於英文寫作，佢自己啲英文咁掂，就係瘋讀英文社論之功，佢位千金在香港大學讀書時考IELTS考到九分滿分，創港大學生紀錄，騎騎，自然係新聞V家教之功也。
只要持之以恒，呢條舊橋係有用嘅，兩年前左丁山將一啲過期《經濟學人》送畀學生V，叫佢專刨幾篇社論，佢考高考時，UE成績唔曳，入到中大，佢自己都認苦讀《經濟學人》社論係有功用嘅。
新聞V嘅師姐「鳳姐」亦來電郵，通知舊書重版，趕在六四二十周年之前推出市場。今天之香港大學生或者已經唔知道六四之事，呢排日日讀《蘋果日報》有助佢哋認識六四。鳳姐話佢嗰一輩記者絕對不會忘記六四，佢嘅電郵話：「是的，絕大部份世事是不值一記的。但是有些事件卻是驚世駭俗，令人永誌難忘。當時置身其中的人，固然刻骨銘心，旁觀者耳聞目睹，同樣為之震撼。那是二十年前的六月四日。在北京。
「那年那月，當時當地，流灑的血一直未得報償，留下的懸案至今無人釋惑，枉死的寃魂何以解慰？因此，這事成了很多人心中的一根刺，當日知悉情勢的人不應忘記，當日關懷國是的人不會忘記，當日身處其間的人更不能忘記。」
點會忘記吖，人證物證俱在，一九八九年曾售出五萬本嘅《人民不會忘記》出版至今二十年，呢本書鐵定重印，銷售收入會撥入「人民不會忘記基金」，用作促進及推動中國和香港新聞自由及出版自由之用，每本售價一百元，另加郵費二十元，海外郵費（平郵）五十元，買書支票抬頭HongKongJournalistsAssociation--BookFund寄往駱克道348-350號十五樓A座畀香港記者協會《人民不會忘記》收。正是昔日新聞、今日歷史，六十四名香港記者之八九民運實錄，就係歷史見證。