轆Book：塑身Fiesta　亮麗搶灘

經濟不景，實用又抵玩嘅五門揭背車仔陣營理所當然成為兵家必爭之地，就連一向喺香港唔多善打細車仗嘅Ford都終於出手，今個夏天將Fiesta收身，變得更有流線美感，加埋用蘋果綠、紫紅、淺藍等鮮色搶灘，要成功奪取少女芳心就話都無咁易啦。

記者：許維雅
攝影：林栢鈞
Model：Debbie@Puremodels

夏日繽紛Look

地小人多嘅香港地，細車一向長賣長有，不少新手心郁郁嘅第一步都係由佢哋入手，其中Fiesta可以話係優質出品嘅信心保證，車身既輕巧靈活，又容易操控，可以喺歐洲大賣多年，最主要當然就係價錢平又夠實用呢個賣點。出名愛靚唔愛命嘅香港人，淨係實用又點夠滿足佢哋嘅要求？新一代Fiesta就改頭換面玩瘦身，所講嘅並唔係將車身縮細，只係將KineticDesign融入新車嘅外形設計，將車窗高度收窄、車尾線條變得圓滑，流線型嘅動感設計剔走之前嘅傳統實用味道，感覺更貼近可愛瀟灑嘅車仔外形。官方網址展示14色車身選擇，七彩鮮艷嘅色調不禁令人聯想起夏日嘅來臨，蘋果綠及紫紅絕對係心水推介，大有潛力開拓一眾女生市場。

■14隻車身顏色選擇，香港代理暫時有黑、紫紅、蘋果綠和淺藍等顏色。

加減波借力

由上一代03年至今，中間只推出過Sport版及ST特別版，大大話都算係Fiesta6年嚟嘅首個新面孔。規格上當然有所提升，馬力由80ps加強到96ps，直路同起步都比起上一代更有力量，可惜上大斜路頭段稍嫌未夠爆發力，油門要踩得頗深才夠力攀爬，幸好有加減波箱彌補了呢方面嘅不足，但論整體操控同樣舒服容易，入彎又穩定，四前速全自動波箱更令新手易於掌握。安全方面，加入咗IPS高智保護系統之外，更選用咗「BORON」呢種超輕高拉力鋼物料，起碼可以給新手車主更貼心嘅保護。成功保留到實用易操控又安全嘅內涵，又能夠喺設計上花上唔少心思，如頭燈、尾燈、側鏡等微細地方同樣作出設計上嘅配合，加上15萬唔使嘅超值價錢，令呢架變得更潮更有吸引力嘅Fiesta，可以跟唔少同類型嘅日系細車於今個夏天拉開戰幔，作出強勁反撲。