恒生（011）首位女CEO（行政總裁）梁高美懿噚日正式上任，搵齊高層「賓架」影大合照，顯示上下一心。梁太全身粉紫色套裝返新工，「紫」氣確係旺，帶動股價高飛，收102.6港銀，升3.79%，梁太笑晒話，希望股價越升越有啦！梁太除咗要忙日常業務外，仲要馬不停蹄出席公益活動，兼要寫Blog勉勵員工，呢位女CEO真忙。
梁太噚日第一日喺恒生嘅內聯網寫Blog，細訴與銀行嘅不解緣，佢未夠10歲，就喺恒生開咗第一個儲蓄戶口，如今從柯清輝手中接棒，佢希望成為cheerleader，為恒生「永恒成長」打氣，仲引用柯大俠飲歌「愛拚才會贏」與員工一同為未來打拼。
與恒生情牽數十載
梁太仲將自己嘅成長歷程濃縮為五張相，以示與員工一齊成長，由3歲小妹妹，到幼稚園跳舞，中學成為嘉諾撒聖心書院學生會會長獲校長頒授襟針，以至後生時着當時至潮喇叭褲，就連大學畢業相，都一次過晒冷！