「立法會議員天主教監察組」3月初發表新議員考勤報告，葉劉、鼠王芬同謝超人被指會議缺席率高，又成日唔投票，被封懶惰議員，三人噚日聯署信件反擊，批評監察組調查手法有問題，有誤導公眾之嫌，妄斷議員未有充份履行職責更加唔公道，要求監察組檢討同修訂調查方法。
「我哋係最勤力嗰幾個」
鼠王芬同八方講，今次只係佢哋三人聯署，並冇邀請其他新議員，佢坦言「唔服個報告」，認為監察組只統計出席率同投票次數，冇評估發言內容同其他地區工作，就指議員懶惰，結論好有問題，「我覺得我哋係最勤力嗰幾個就真。」
佢又強調，今次只係「學術上討論」調查方法，但唔排除日後採取進一步行動。
監察組發言人許煒斌話，統計方法沿用多年，以客觀數據為議員考勤做法公平，「所有議員都係咁計，一視同仁。」
許煒斌承認只量化議員出席率、投票次數，未能兼顧議員其他工作或發言內容，不過開會、投票係議員最基本職責，「咁都做唔到，係咪應該反省吓？」