一收工咪講笑，手痕要去解癢，但講嘅唔係打麻雀，而係去影夜景相。一來花成皮嘢買咗部相機，有時間都唔影係好蝕；二來香港夜景出晒名，唔識就地取材更係抵打。今日〈數碼達人〉將繼續深入淺出，教大家影靚靚夜景，睇完文字版後，記得Click入以下網址睇短片教學呀﹗
記者︰陸俊雄
攝影︰林栢鈞
Models︰Wing@PureModels
慢快門影車變拖燈
影法是走上行人天橋，或站在車來車往的馬路邊，影車的流動。用長時間曝光，就可影到長長的拖燈相，充滿速度感。如果嫌白燈光太常見太悶，可試試將白平衡轉為「陰影效果」（Shadow），相片拍出來會變得偏黃及帶暖色調。所以只要花啲小心思，影夜景都可以唔悶。
MagicMoment有燈有夜景
唔好以為天黑齊先叫夜影！其實見日落時就已經好準備，因為日落前後半小時，個天會呈紫藍色，鬼咁浪漫，另有一番風味。
呢個時間影出嚟嘅相，唔單止有大廈發出的燈光，輪廓線比起全黑時更易突出到。不過想影得更靚，始終睇天面色，香港早排天氣真係差到不得了，即使早上好天，晚上煙霞還是厲害。畀埋提示大家，呢期好準時晚上7點就出現MagicMoment，所以6點半左右好Set定機準備喇！
校低ISO相質細滑
現今新款相機，大多對高感光度嘅雜訊控制非常好，變相可用手持、高速快門影夜景；但大家不妨高低ISO一試，會發現始終用低ISO質素較好。
例如在推高ISO到1600時，再配合大光圈如f/4、1/10秒快門，影出來總是細緻度不夠，黑位不夠實；無計，為了防止快門速度過慢導致手震，呢個就係取捨。想影得靚啲，點都係將ISO調至100，用慢速快門如10秒或更長時間，收細光圈到f/11進行長時間曝光，咁影出來的光線就會實得多。
下期預告：BlackberryStorm硬拼iPhone3G（5月22日/9:00am）
http://av.appledaily.com
