豬流感疫情暫時告一段落，感染甲型H1N1流感病毒嘅25歲墨西哥男子最快今日出院。個幾星期前佢通過重重檢疫關卡入咗嚟，香港卻冇好似沙士時咁社區大爆發，表面上係香港有運今次好彩，實際上卻要多得一個護士，如果唔係佢細心兼觀察力強，疫情可能有排未收科。
憑膚色發現隱形病人
大家都知道呢個墨西哥人喺上海嚟到香港後，忽然覺得唔舒服，自行坐的士去律敦治醫院，一般人未必知嘅係，佢去到醫院時冇發燒，亦冇第一時間透露自己來自疫區，只係話由上海嚟香港。知情人士稱，負責為佢檢查嘅護士見佢黑黑實實，就問多句係邊個國家人，不問猶自可，追問下對方終於自爆來自墨西哥！
搵到呢位「隱形病人」過程有古講，重組案情後，就會發現前線醫護人員真係身負重任。由於墨西哥豬流感犀利，該護士不敢怠慢，立即叫醫生到場為墨西哥來客檢查，八方之前講過，由於佢冇明顯症狀，因此呢位醫生都診斷唔到佢是否中招，不過為安全計，梗係唔可以貿貿然俾佢出院，萬一睇漏眼，後果不堪設想。
所以呢位醫生再搵幫手，無幾耐，兩位較資深嘅醫生到場，三師會診，詳細了解墨西哥人情況，評估後認為唔可以掉以輕心，即刻送佢入隔離病房，同時抽取分泌物化驗，經三重驗證後，果然係感染豬流感病人，呢個時候，整個政府正式進入應戰狀態，至於之後發生嘅事，都係歷史咯。
如果當日護士識別唔到呢位墨西哥人，俾佢繼續喺香港自由行四處播毒，八方肯定香港家唔會有安樂日子，隨時已經社區大爆發，八方聽聞醫管局高層對呢位醒目護士同幾位醫生表現都甚滿意，成功為香港把關防疫，可靠程度準過探熱針，應記一功咁話。
除咗醫護人員，紀律部隊抗疫時期都好忙碌，保安局局長李少光噚日巡視西灣河消防局同救護站，檢視前線人員喺執行防疫任務時穿着嘅個人防護裝備，又向消防處先遣急救員和救護員說，呢場抗疫戰爭仍未結束，紀律部隊要繼續保持高度警覺，對抗流感疫症。
mailto:[email protected]