阿仙奴禮拜二歐聯出局後，前鋒賓特拿唔知係咪受唔住刺激，翌日凌晨喺倫敦著名夜店門外忽然草彅剛上身，酩酊大醉，衰到條褲褪到膝頭哥露埋底褲，猥褻到無倫。領隊雲格要為出局檢討、備戰禮拜日對車仔場倫敦打吡，賓特拿家陣剝褲「贈興」，真係多得你唔少。
相比起日本偶像組合SMAP成員草?剛，早排喺公園醉酒全裸鬧事被捕，賓拿特雖然無咁衰相，但話冇失儀就勢係假。話說呢位21歲丹麥前鋒，禮拜二晚歐聯後備踢咗27分鐘，見證隊波出局後，就去咗倫敦夜店Boujis隊酒隊到啤啤夫。
草彅剛上身忘形露黑底
劈到凌晨4點幾，就衰到要由保安人員帶走，行出門口時唔知係有心定無意，成條牛仔褲甩到落膝頭咁滯，條黑色底褲同埋入面嘅龐然巨物形狀一覽無遺。我求大俠睇過幾張佢俾人帶走嘅相，睇見連帶佢走嘅保安人員都忍唔住笑，真衰相。酒醉三分醒，似乎賓特拿都知醜，離開時搵件褸遮住個頭，十足做賊俾差人笠住個頭帶走，早知今日，何必當初？
同「斷背剛」一樣，到賓特拿清醒番，當然要公開道歉，即管聽吓佢點解釋。「我愛球會，噚晚輸俾曼聯令我極為失落，而踢歐聯決賽係我夢想，失敗對我打擊好大。」
勢遭雲格雪藏
好在賓特拿唔同草?剛，至少衰咗講句嘢都仲算得體：「當然，我噚晚嘅所作所為，唔應該以失落作為藉口，我好後悔。我唔能夠改變過去，但會從錯誤中吸取教訓。我會將錯誤轉化為動力，用喺餘下3場波度，而禮拜日對車路士就係開始。」
雖然係咁，但禮拜日場波可以話係阿仙奴今季最後目標，希望贏宿敵攞尾采。場波咁重要，雲格平時大戰都唔用賓特拿，家陣就更加唔會，至怕個儍仔失驚無神受唔住刺激除褲，就貽笑大方啦。