近排睇一啲投資專欄，唔少之前睇淡嘅前輩都開始改口風，當然個市都升到破完萬六再破萬七，家陣先確認股市轉勢，繼之而入市，難免要高追。
前幾日好多隻熊證被「啪」，身邊唔少朋友都話牛市已經重臨！究竟係咪真？都係嗰句，往往都係過後先可以確認。
不過牛市嚟大家自然搵到食，但即使牛市未嚟，都應該隨時準備，等隻「牛」嚟嘅時候可以把握到嘛！
忌怕錯失機會高追
睇《華爾街日報》有篇文章──RulesforInvestingintheNextBullMarket（下一次牛市的投資法則），裏面提及到嘅12條法則，綜合嚟講都係叫大家唔好怕錯失機會而去高追，或者警剔大家好容易有羊群心態，雖然用唔同字眼、唔同標題，但只要記得嗰張「心電圖」，基本上就可以概括了解作者想講乜。
不過呢篇文章唔係冇可讀性，其中提到一點，敏妮就覺得幾受用。
作者提醒讀者，市場係群體行動，所有人都買嘅時候，股市自然會升，當大家都掟貨時，股市自然會跌。
係就係有啲「阿媽係女人」嘅感覺，但正如作者所講，當大家都喺度估緊市場趨勢嘅時候，實際上只係追逐緊鏡入面自己嘅倒影。
市場係群體行動
當然自己嘅倒影固然難捉，但作者似乎忽略咗，喺金融市場裏面，任何活動都總有個「始作俑者」，偏偏通常都係大戶先行，散戶後跟，散戶往往追逐緊嘅，唔係鏡入面自己嘅倒影，而係大戶嘅倒影，都幾悲！
溫敏妮
http://wanmanli.com/blogs/