千億新抱徐子淇懷胎9個月，預產期下月，她在安胎期間不忘行善，在家中做手作仔，以一家四口手拉手拼貼公仔設計環保袋，為內地愛滋病童籌款之餘，也隱約表露其幸福家庭生活。本來子淇昨日準備大着肚現身，但豬流感警戒未除，她最終收到徐媽媽order，不准出席人多的公開活動。
徐子淇（Cathy）一向致力的智行基金會，昨日舉行「袋袋平安」慈善環保袋設計義賣，為華中地區的愛滋病童籌款。116個由名人、明星及設計師創作的環保袋，每個以1,000元起標拍賣，參與設計的林嘉欣、鄧達智、徐子淇的化妝師GaryChung等，昨日都在跑馬地出席義賣宣傳，下月預產期的徐子淇原定亮相，但最終沒出現。
母怕人多空氣雜
智行基金會創辦人杜聰說：「Cathy有事，所以唔嚟，佢本來都話嚟，應該有急事。」但據公關透露，全因子淇媽媽開到聲，覺得子淇陀住大肚，腹大便便，外面人多空氣雜，為子淇和BB安全起見，不准她出席公開活動。現場展出子淇設計的環保袋，曾經揚言要生到30歲（老爺追加生到33歲）的她，袋面設計有一家四口手拉手的溫馨畫面，充份表現她愛小孩的心意，中間一男一女小孩，相信湊個好字都是她的希望。
GaryChung則對子淇缺席說：「佢家唔方便周圍走，佢個肚咁大，呢度又咁多人又有斜路，不過佢心情都好輕鬆。」
林嘉欣則在袋上加了「CareAIDS」字樣，袋面又有兩個心，她說：「一個代表大人，一個代表細路，希望大家打開心扉，互相關懷。」她透露剛去了法國為雜誌拍封面照，她說：「好開心因為嗰邊天氣好好，做完嘢我哋一大班人去咗鐵塔下野餐，好好feel。」她謂出遊在外都很小心行事，不時用消毒gel洗手，飛機上都全程戴口罩。
嘉欣拍戲少選擇
至於電影工作，嘉欣說：「有一部中國導演嘅新電影，但仲爭啲資金，希望拍得成啦，因為個劇本真係好好。」不過她補充自己不是只拍另類電影，她說：「啲人搵我都係拍文藝或驚慄，但其實我冇分，更多選擇更加好！」
採訪：LawWaiMan
攝影：ChanShunChing