現年64歲、有奇女子之稱嘅狄娜（原名梁幗馨），早前傳出患婦科重病喺養和醫院接受治療，至於佢變咗性嘅兒子馬天如（Michael）緊張媽咪病情，即刻放低外地生意貼身照顧。
買紙尿片探病
有消息指狄娜情況有變，上月底轉咗入深切治療部病房（ICU），馬天如日前喺養和醫院附近嘅萬寧買成人紙尿片去探病，有時仲會留喺病房過夜陪狄娜，等佢可以安心養病。
馬天如探病時，有時仲會有女友同行，但因為佢哋要迴避傳媒，所以出入醫院都特別小心。
「喺醫院休息吓」
狄娜喺ICU留醫，情況令人擔心，馮仁昭噚日打電話畀佢助手朱小姐查問，佢話：「狄娜好好，佢未出院，佢仲想喺醫院休息吓先，因為有護士醫生照顧，大家都好放心。」朱小姐上月中先幫狄娜向傳媒交代病情，馮仁昭都希望佢可以早日痊癒，親自出嚟同大家見吓面。
有指狄娜最初入院時由婦產科權威黃令翠醫生主診，後來又改咗搵息影女星陳曦齡嘅丈夫、著名心臟科專家謝德富主診。
